上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
大闢凱旋的歌
22:1 ( 詩 18 )
上主救大闢脫離所有的對敵及掃羅的手了後，伊向上主唸此首詩：
22:2 上主是我的山巖，我的要塞，我的拯救者；
22:3 是我的上帝，我的石磐，我欲倚靠伊；
伊是我的盾牌，救我的氣力，我的堡壘，我的避難所。
我的拯救者，你有救我脫離強暴。
22:4 我求叫應該受稱讚的上主，
我就得著解救脫離對敵。
22:5 死亡的大湧圍困我；
毀滅的大水互我驚。
22:6 陰府的索捆縛我；
死亡的羅網網著我。
22:7 我佇苦難中祈求上主，
對我的上帝求叫；
伊佇伊的殿內聽我的聲；
我的懇求有入伊的耳孔。
22:8 伊受氣，地就搖泏；
天的根基嘛振動搖閣泏。
22:9 對伊的鼻孔有煙淐出；
對伊的嘴有火發出，
連土炭嘛𤏸起來。
22:10 伊搋開天，親身降臨；
伊腳下有厚厚的烏雲。
22:11 伊騎天使基路伯啲飛；
伊坐風的翼顯現。
22:12 伊用烏暗做伊隱密的所在，
用水及密雲圍起來做帳房。
22:13 伊發出的光，
互炭𤏸起來。
22:14 上主對天頂彈雷，
至高的上帝出聲。
22:15 伊射箭，互對敵四散；
伊發出熠爁，互𪜶混亂。
22:16 上主一下責備，
鼻孔的氣一下出，
海底就露出，
大地的根基嘛露現。
22:17 伊對頂面伸手扭我，
對大水給我救出來。
22:18 伊救我脫離兇猛的對敵，
脫離怨恨我的人；
因為𪜶比我較強。
22:19 我抵著災難的時，𪜶來攻擊我；
毋拘上主是我的倚靠。
22:20 伊導我到開闊安全的所在；
伊救我，因為伊意愛我。
22:21 上主因為我正直報答我，
因為我的所做清氣報賞我。
22:22 我遵守上主的道路，
毋曾作歹離開我的上帝。
22:23 伊所有的命令我有遵守；
伊的規例我毋曾放拺。
22:24 我佇伊的面前無通指責；
我保守家己離開罪惡。
22:25 因為我正直，上主報賞我；
佇伊的目睭前，我的所做清氣。
22:26 慈愛的人，你用慈愛對待伊；
純全的人，你用純全對待伊；
22:27 清氣的人，你用清氣對待伊；
毋拘，奸詐的人，你用彎曲對待伊。
22:28 困苦的人，你解救伊；
自高的人，你敵視伊，給伊降低。
22:29 上主，你是我的燈；
上主給我的烏暗變做光明。
22:30 我因為倚靠你，會當攻破敵軍；
倚靠我的上帝，會當跳過城牆。
22:31 此位上帝，伊的道路完全。
上主的話有過火鍛鍊；
倚靠伊的，伊做盾牌保護𪜶。
22:32 上主以外，豈有別個上帝？
阮的上帝以外，豈有石磐通倚靠？
22:33 此位上帝是我堅固的要塞；
伊引導我行安全的路。
22:34 伊互我的腳親像鹿𠢕走，
閣互我徛在佇高的所在。
22:35 伊訓練我的手𠢕交戰，
互我的手會開銅的弓。
22:36 你用盾牌解救我；
你的幫贊互我堅強。
22:37 你互我踏的地開闊安全；
我的腳毋曾踏脫。
22:38 我追我的對敵到趇著𪜶；
𪜶無滅亡，我𣍐倒轉。
22:39 我拍𪜶悿悿，互𪜶𬦰𣍐起來，
到𪜶倒佇我的腳下。
22:40 你賜我氣力互我𠢕交戰；
你互攻擊我的人攏降服佇我下面。
22:41 你互我的對敵越轉身逃走，
閣互我剿滅怨恨我的人。
22:42 𪜶求叫，無人救𪜶；
求叫上主，伊嘛無應。
22:43 我給𪜶搥到碎碎，親像地上的土粉，
給𪜶踐踏，親像街路的土糜。
22:44 你救我脫離反叛我的人民；
你保護我，互我做列邦的頭。
我毋識的人民會服事我；
22:45 外邦的人屈身投降，
𪜶一下聽著我的名就順服。
22:46 外邦的人失膽，
行出𪜶的陣地，準備欲作戰。
22:47 上主永遠活啲！
願我倚靠的石磐受稱讚；
願救我的石磐 — 上帝受高舉。
22:48 伊就是為我申冤彼位上帝；
伊互眾人降服佇我腳下。
22:49 伊救我脫離我的對敵。
你提拔我高過攻擊我的人；
你救我脫離強暴的人。
22:50 上主啊，因為按呢我欲佇列邦中感謝你，
唱歌稱讚你的名。
22:51 上主賜極大的救恩互伊設立的王，
施落慈愛互伊抹油選立的人，
互大闢及伊的後代，直到永遠。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。