上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
拿單的信息及大闢的悔改
12:1 上主差拿單去見大闢；拿單到伊遐，給伊講：「佇某一個城有兩個人，一個好額，一個散赤。
12:2 好額的有牛羊真多；
12:3 散赤的什麼都無，只有一隻伊買來飼的羊仔子；伊給飼，互彼隻羊仔子及伊的子兒做夥長大，做夥食，做夥飲，閣做夥睏，給看做親像家己的查某子。
12:4 有一個出外人來好額人遐；好額人毋甘對家己的羊群牛群中掠一隻來招待人客，顛倒掠散赤人彼隻羊仔招待伊。」
12:5 大闢對彼個好額人發大受氣，給拿單講：「我指永活的上主咒誓，做此個代誌的人著死；
12:6 伊著賠四倍的羊仔，因為伊做此個事，無憐憫的心。」
12:7 拿單對大闢講：「你就是彼個人！上主 — 以色列的上帝按呢講：『我選立你做以色列的王，救你脫離掃羅的手。
12:8 我用你主人的厝宅互你，嘛將你主人許個某交互你，閣將以色列家及猶大家互你；諸個你若猶嫌無到，我會閣較多互你。
12:9 你是按怎藐視上主的命令，行伊看做歹的代誌？你借亞捫人的刀刣死赫人烏利亞，互伊死佇戰場，閣娶伊的某做你的某。
12:10 今刀劍欲永遠無離開你的家，因為你藐視我，娶赫人烏利亞的某做你的某。』
12:11 上主閣按呢講：『我欲互災禍對你家己的家起來攻擊你；我欲佇你的目睭前，將你許個某互你身邊的人，伊欲佇當頭白日及𪜶做夥睏。
12:12 你佇暗中做的代誌，我欲當頭白日，佇以色列眾人的面前互諸個代誌發生。』」
12:13 大闢給拿單講：「我有得罪上主！」
拿單給大闢講：「上主已經除去你的罪，你𣍐致到死。
12:14 總是因為你做此個代誌，大大藐視上主，所以你所生彼個子一定會死。」
12:15 拿單就倒去𪜶兜。上主拍大闢及烏利亞的某生的嬰仔，嬰仔就破病真傷重。
12:16 大闢就為著彼個子對上帝祈禱。大闢閣禁食，入去內面通暝倒佇土腳。
12:17 伊宮內許個長老去到伊的身邊，欲給伊扶起來；毋拘伊毋肯，嘛無欲及𪜶做夥食。
12:18 到第七日囝仔死；大闢的人臣毋敢給伊講囝仔死啦；因為𪜶講：「囝仔猶活啲，咱勸伊，伊都毋聽，若給伊講囝仔死去，伊毋知會按怎傷害家己？」
12:19 大闢看著伊的人臣啲吱嘸吱茲，就知囝仔已經死。大闢問伊的人臣講：「囝仔死啊是無？」
𪜶講：「死去啊。」
12:20 大闢就對土腳起來，洗身軀，抹油，換衫，入去上主的殿敬拜。然後伊倒去伊的厝，吩咐人提食物來，伊就食。
12:21 人臣問伊：「你哪會按呢做？囝仔活啲的時，你禁食啼哭；囝仔死，你反轉起來食。」
12:22 大闢講：「囝仔猶活啲，我禁食啼哭，因為我想講，上主會憐憫我，互囝仔活啲。
12:23 今囝仔已經死，我禁食有啥路用？我豈會當互伊倒轉來？我會去伊遐，毋拘伊𣍐當轉來我遮。」
所羅門出世
12:24 大闢安慰伊的某拔示芭，及伊同房，伊就生一個子，給伊號名叫做所羅門；上主疼伊，
12:25 就託先知拿單給伊號名叫做耶底底亞。
大闢攻取拉巴城
12:26 ( 代上 20:1-3 )
約押攻打亞捫人的京城拉巴。
12:27 約押差使者去見大闢講：「我已經取著拉巴的水源地。
12:28 今你著聚集其他的軍兵來圍攻此個城，給伊佔領；驚了我取此個城，人會用我的名來叫此個城。」
12:29 大闢就召集所有軍兵去拉巴，給伊攻取。
12:30 伊提著米勒公頭殼頂的王冠，是用大約三十五公斤的金造的，閣有鑲寶石。人將此頂王冠戴佇大闢的頭殼。大闢對城內取真多財物，
12:31 閣給城內的人民掠出來，互𪜶用鋸仔、鐵耙仔，及鐵的斧頭做苦工，閣佇瓦窯做苦工；大闢攏用此款方法對待亞捫許個城的人。後來，大闢及所有的軍兵倒去耶路撒冷。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。