上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
大闢拍敗亞捫人及敘利亞人
10:1 ( 代上 19:1-19 )
後來，亞捫人的王拿轄死，伊的子哈嫩續接伊作王。
10:2 大闢講：「我欲好款待哈嫩，親像伊的老父拿轄好款待我按呢。」大闢因為哈嫩的老父死，就派人臣去慰問。
大闢的人臣到亞捫人境內的時，
10:3 亞捫人的領袖給𪜶的主人哈嫩講：「大闢派人來慰問你，你想講伊真正尊敬你的老父噢？大闢派伊的部下來見你，豈毋是欲詳細偵探此個城，看欲按怎給咱征服？」
10:4 哈嫩就掠大闢的人臣，給𪜶的嘴鬚剃一半，閣剪斷𪜶的衫下半截，互𪜶露出下體，然後趕𪜶倒去。
10:5 有人對大闢報告，大闢就派人去接𪜶，因為𪜶感覺非常見笑。王講：「留𫢶耶利哥，聽候嘴鬚發長才倒來。」
10:6 亞捫人知𪜶惹大闢受氣，就差人去倩伯‧利合及瑣巴的敘利亞人，步兵兩萬，及瑪迦王的人一千，陀伯人一萬兩千。
10:7 大闢聽見，就派約押導所有勇猛的軍隊出去。
10:8 亞捫人出來佇城門的頭前排陣；瑣巴及利合的敘利亞人、陀伯人，及瑪迦人另外佇野外排陣。
10:9 約押看見伊的前後攏有對敵排陣，就對以色列精兵的中間閣再揀一寡勇士出來，排陣欲抵敵敘利亞人。
10:10 約押將其他的兵士交互伊的小弟亞比篩，𪜶就面對亞捫人排陣。
10:11 約押對亞比篩講：「敘利亞人若比我較強，你著來幫贊我；亞捫人若比你較強，我會去幫贊你。
10:12 著堅強！著為咱的同胞及咱上帝的城勇敢出戰。上主會照伊看做好的去做。」
10:13 約押導伊的軍隊進前及敘利亞人交戰；敘利亞人戰敗，就佇約押的面前逃走。
10:14 亞捫人看著敘利亞人逃走，嘛佇亞比篩的面前逃走入城。約押就對亞捫人遐倒去耶路撒冷。
10:15 敘利亞人看著家己刣輸以色列人，就重整軍隊。
10:16 瑣巴王哈大底謝派人去幼發拉底河彼旁召敘利亞的軍隊來；𪜶就來到希蘭。哈大底謝的將軍朔法導軍隊來。
10:17 有人報告大闢，伊就召集以色列全軍過約旦河，進軍到希蘭。敘利亞人排陣，及大闢交戰。
10:18 敘利亞人刣輸以色列人；大闢刣死敘利亞的戰車兵七百人，馬兵四萬，閣將𪜶的將軍朔法刣死佇遐。
10:19 哈大底謝屬下許個王看著𪜶刣輸以色列人，就及以色列講和，歸順𪜶。對按呢，敘利亞人就毋敢閣幫贊亞捫人。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。