上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
大闢作全以色列的王
5:1 ( 代上 11:1-3 14:1-7 )
以色列眾支族來希伯崙見大闢，講：「阮是你的骨肉。
5:2 較早掃羅做阮的王的時，導以色列去交戰的是你；上主嘛曾給你講：『你會牧養我的子民以色列，嘛會做以色列的統治者。』」
5:3 以色列的長老攏來希伯崙見大闢王，王就佇希伯崙，佇上主的面前及𪜶立約。𪜶就用油抹大闢，設立伊做以色列的王。
5:4 大闢坐位的時三十歲，作王四十年久。
5:5 伊佇希伯崙做猶大王七年六個月；佇耶路撒冷做全以色列及猶大的王三十三年。
大闢攻佔耶路撒冷
5:6 ( 代上 11:4-9 )
王及隨伊的人去到耶路撒冷，欲攻擊住佇遐的耶布斯人。耶布斯人對大闢講：「你無可能攻入來！阮連失明的、腳跛的都會當給你拍敗。」𪜶按算大闢一定𣍐當攻入來。
5:7 毋拘大闢有攻取錫安的堡壘，就是現在的大闢城。
5:8 彼日，大闢講：「人若欲拍耶布斯人，著對引水的磅孔上去，去拍大闢所怨恨許個腳跛的、失明的。」所以有俗語講：「失明的、腳跛的𣍐用得入去上帝的殿。」
5:9 大闢住佇堡壘，給彼個所在號做大闢城。大闢對米羅向內面四圍起牆。
5:10 大闢愈來愈強盛，因為上主 — 萬軍的統帥上帝及伊同在。
5:11 泰爾王希蘭派使者帶柏香柴，及作木師傅、拍石師傅去大闢遐，給大闢起宮殿。
5:12 大闢就知上主堅立伊做以色列王，閣為著上主的子民以色列互伊的國強盛。
5:13 大闢離開希伯崙了後，娶耶路撒冷的女子做嬪妃，閣生後生及查某子。
5:14 佇耶路撒冷生的子是沙慕亞、朔罷、拿單、所羅門、
5:15 益轄、以利書亞、尼斐、雅非亞、
5:16 以利沙瑪、以利雅大，及以利法列。
刣贏非利士人
5:17 ( 代上 14:8-17 )
非利士人聽著大闢受抹油選立做以色列王，就全力上來追尋大闢。大闢聽著就落去堡壘。
5:18 非利士人來，遍滿利乏音山谷。
5:19 大闢問上主講：「我豈通進攻非利士人？你豈欲將𪜶交佇我的手？」
上主給大闢講：「你去，我一定會將非利士人交佇你的手。」
5:20 大闢來到巴力‧比拉心，佇遐給非利士人拍敗，講：「上主佇我的面前給我的對敵衝散，親像大水給堤岸沖破。」因為按呢，彼個所在就叫做巴力‧比拉心。
5:21 非利士人逃走的時給𪜶的偶像擲佇遐；大闢及隨伊的人給許個偶像拾去。
5:22 非利士人閣來，遍滿利乏音山谷。
5:23 大闢問上主。上主講：「毋通正面進攻，著踅去𪜶的後面，佇桑材樹林的頭前給𪜶攻擊。
5:24 你聽著樹尾有行軍的聲，就著趕緊進攻，因為彼時上主已經佇你的頭前攻擊非利士人的軍隊。」
5:25 大闢就照上主的命令去做，對迦巴攻擊非利士人直到基色。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。