上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
大闢為著掃羅及約拿單哀傷
1:1 掃羅死了後，大闢刣贏亞瑪力人倒來，佇洗革拉住兩日。
1:2 第三日，忽然有一個人對掃羅的軍營來，衫拆破，頭殼糝土粉，到大闢遐，仆佇土腳拜伊。
1:3 大闢問伊講：「你對叨位來？」
伊應講：「我對以色列的軍營逃走來。」
1:4 大闢閣問伊：「代誌按怎？緊給我講。」
伊應講：「軍隊對戰場刣輸逃走，真多人戰死，連掃羅及伊的子約拿單嘛死。」
1:5 大闢給彼個少年人講：「你按怎知掃羅及伊的子約拿單已經死？」
1:6 給伊報告的少年人講：「我抵好去基利波山，看著掃羅倚佇伊的槍，有戰車馬兵趇倚伊。
1:7 伊越頭看著我，就叫我；我應講：『我佇遮。』
1:8 伊問我：『你是什麼人？』我應講：『我是亞瑪力人。』
1:9 伊閣給我講：『請來我邊仔給我刣死。我猶活啲，毋拘真痛苦。』
1:10 我就倚去，給伊刣死，因為我知伊倒落去，一定𣍐活；我就提伊頭殼的王冠及伊的手環，帶來我的主遮。」
1:11 大闢就拆裂衫，跟隨伊的人嘛按呢。
1:12 𪜶為著掃羅及伊的子約拿單、上主的子民及以色列家，悲哀啼哭，禁食到日暗，因為𪜶攏死佇刀下。
1:13 大闢給對伊報告的少年人問講：「你是叨位的人？」
應講：「我是出外人的子，亞瑪力人。」
1:14 大闢對伊講：「你親手刣死上主選立的王，哪𣍐驚？」
1:15 大闢叫一個少年人，講：「來，去給刣死。」伊就去給彼個亞瑪力人刣死。
1:16 大闢給伊講：「這是你家己做得來的，因為你親嘴作證講：『我刣死上主選立的王。』」
大闢為掃羅及約拿單作哀歌
1:17 大闢作哀歌，追悼掃羅及伊的子約拿單。
1:18 伊命令人將此首叫做「弓歌」的詩教猶大人唱。此首詩有記載佇《雅煞珥記》：
1:19 以色列啊，你的尊榮者受刣佇山頭；
大英雄竟然倒落去！
1:20 毋通佇迦特宣布，
毋通佇亞實基倫的街路報揚，
才免非利士的查某囝仔歡喜，
無受割禮的人的查某子快樂。
1:21 基利波山啊，
願你遐無雨，無露水，
土地拋荒無出產；
因為佇你遐勇士的盾牌受㧒确，
掃羅的盾牌無閣抹油。
1:22 約拿單的弓無𠲿著對敵的血𣍐收回；
掃羅的刀無食著勇士的油𣍐入鞘。
1:23 掃羅及約拿單人人意愛，受人敬重；
生無分開，死無相離。
𪜶比鷹鳥較緊，
比獅較強。
1:24 以色列的查某子啊，著為掃羅啼哭！
伊曾互恁穿朱紅色的媠衫，
互恁的衣服有黃金做妝飾。
1:25 勇士竟然倒佇戰場！
約拿單受刣佇你的山頭！
1:26 我的兄弟約拿單啊，我為你哀傷；
你及我上親。
你對我的疼真奇妙，
贏過婦仁人的疼。
1:27 勇士竟然倒落去！
武器嘛攏毀壞！
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。