上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
人違背命令
3:1 主上帝所造野地一切的動物，蛇上詭詰。蛇對婦仁人講：「上帝豈有影講，園內所有的果子恁攏𣍐用得食？」
3:2 婦仁人對蛇講：「園內所有的果子阮攏通食，
3:3 只有園中彼欉樹的果子，上帝曾講：『恁毋通食，嘛毋通摸；恁若毋聽，恁會死。』」
3:4 蛇對婦仁人講：「恁無一定會死。
3:5 上帝知，恁食的時，恁的目睭就會開，會親像上帝分別善惡。」
3:6 婦仁人看彼欉樹的果子好食，合目，閣會互人有智慧，就真欣羨。伊就挽彼個果子來食，續互及伊做夥的丈夫食，伊的丈夫嘛食。
3:7 𪜶兩個人的目睭就開，才知家己是赤身露體，就編無花果樹葉做裙縖啲。
3:8 黃昏涼冷的時，彼個人及伊的婦仁人聽著主上帝佇園內啲行的聲，就匿佇園裡的樹仔內，閃避主上帝的面。
3:9 主上帝叫彼個人，講：「你佇叨位？」
3:10 彼個人就講：「我佇園內聽著你的聲就真驚，因為我赤身露體，就匿起來。」
3:11 主上帝就問：「什麼人給你講你赤身露體？你是毋是食我吩咐你毋通食彼欉樹的果子？」
3:12 彼個人講：「你互我及我做夥彼個查某人，伊提彼欉樹的果子互我，我就食。」
3:13 主上帝對婦仁人講：「你哪會按呢做？」
婦仁人講：「蛇給我引誘，我就食。」
上帝判罪
3:14 主上帝對蛇講：
「你既然做此個代誌，
佇一切的牲生及野地的走獸，
你特別著受咒詛；
你欲用腹肚行路，
一生食土粉。
3:15 我欲互你及婦仁人結冤仇，
你的後代及伊的後代嘛結冤仇；
伊欲傷你的頭殼，
你欲傷伊的腳後蹬。」
3:16 閣對婦仁人講：
「我欲大大加添你懷孕的痛苦；
你欲催陣痛苦才生子；
你欲戀慕你的丈夫，
伊欲管轄你。」
3:17 主上帝嘛對亞當講：
「你既然聽趁你的某的話，
食我吩咐你毋通食彼欉樹的果子，
所以土地因為你的緣故受咒詛；
你著一世人勞苦，才會當對土地得著食物。
3:18 土地欲因為你發莿及蒺藜；
你欲食野地的菜蔬。
3:19 你著汗流滿面才有通食，
到你歸土，因為你是對土捏造的；
你本是土粉，嘛欲歸佇土粉。」
3:20 彼個人給伊的某號名叫做夏娃；因為伊是人類的老母。
3:21 主上帝為著亞當及伊的某用皮做衫互𪜶穿。
受趕出伊甸園
3:22 主上帝講：「今，此個人已經及咱像款，會分別善惡；伊若伸手去挽活命樹的果子來食，就會活到永遠。」
3:23 主上帝就將伊趕出伊甸園，互伊去種作土地；伊是對土捏造出來的。
3:24 主上帝將彼個人趕出去以後，佇伊甸園的東旁設四面轉踅發火焰的劍，派天使基路伯防守去活命樹的路。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。