上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
大闢無刣掃羅
24:1 掃羅追趇非利士人倒來的時，有人給伊講：「大闢𫢶佇隱‧基底的曠野。」
24:2 掃羅就對以色列中導特選的兵三千，去野山羊山巖遐尋大闢及跟隨伊的人。
24:3 掃羅來到路邊羊椆附近的山洞，入去欲大便。大闢及跟隨伊的人匿佇洞內較深的所在。
24:4 跟隨大闢的人對伊講：「上主曾給你講：『我欲將你的對敵交佇你的手，你通照家己的意思對待伊。』今機會來啦。」大闢就恬恬仔爬去割掃羅外衫的衫仔裾。
24:5 後來，大闢因為割掃羅的衫仔裾心內不安，
24:6 對跟隨伊的人講：「伊是上主所抹油的王；我絕對毋敢對我的主人，就是上主所抹油的，做此款代誌傷害伊。」
24:7 大闢用諸個話阻擋跟隨伊的人，不准𪜶攻擊掃羅。掃羅𬦰起來，對洞內出去，繼續行伊的路。
24:8 大闢嘛對洞內出去，隨佇掃羅的後面，喝講：「我的主，我的王！」掃羅越頭看；大闢就仆佇土腳拜伊。
24:9 大闢對掃羅講：「王啊，你是按怎聽人的話，講『大闢想欲害你』？
24:10 今仔日你有親目看著，你佇洞內的時，上主將你交佇我的手。有人叫我刣你，毋拘我不忍心；我講：『我無欲出手害我的主，因為伊是上主所抹油的。』
24:11 我的父啊，你看咧，你外衫的衫仔裾佇我的手裡；我只有割你的衫仔裾，無給你刣。按呢，你會當看出我的手無做什麼背逆你的歹代誌。我毋曾得罪你，毋拘你追趇我，欲揲我的性命。
24:12 願上主佇你我的中間裁決。願上主因為你的所做替我報復；我𣍐出手害你。
24:13 古早人按呢講：『歹代對歹人出。』我𣍐出手害你。
24:14 以色列王出來欲掠啥人，欲追趇啥人？欲尋死狗，掠虼蚤噢？
24:15 願上主做判官，佇你我的中間裁決。願伊監察，為著我的案件辯護，救我脫離你的手。」
24:16 大闢對掃羅講諸個話了後，掃羅講：「我的子大闢，這是你的聲噢？」掃羅就大聲啼哭。
24:17 伊給大闢講：「你比我較正，因為你對我真好，我煞顛倒用歹報你。
24:18 今仔日你的所做表明你用好對待我，因為上主有將我交佇你的手，毋拘你無給我刣死。
24:19 人若尋著伊的對敵，豈會放伊走？願上主因為今仔日你對我的所做用好報你。
24:20 今我知你一定會作王，以色列國一定會佇你的統治下堅立。
24:21 所以你著指上主對我咒誓，你𣍐剿滅我的後代，𣍐將我的名對阮的家族擦消。」
24:22 大闢就對掃羅咒誓。然後，掃羅倒去伊住的所在；大闢及跟隨伊的人上去山區的要塞。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。