上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
掃羅迫害大闢
19:1 掃羅要求伊的子約拿單及所有的官長著刣死大闢。毋拘約拿單真意愛大闢，
19:2 就給大闢講：「我的老父想欲刣你；你著細膩，明仔早起你去匿𫢶祕密的所在。
19:3 我會去野外你匿的所在，徛佇我的老父身邊，及伊講起你的代誌；我若知影什麼，會給你講。」
19:4 約拿單對伊的老父替大闢講好話，講：「請王毋通傷害你的僕人大闢，因為伊毋曾傷害你。伊所做的攏對你真有幫贊。
19:5 伊曾冒性命的危險，刣死彼個非利士人。上主有互以色列人得著大勝利；諸個代誌你攏知，嘛真歡喜。今是按怎王無緣無故欲刣大闢，流無辜的人的血得罪上帝？」
19:6 掃羅聽約拿單的話，就指永活的上主咒誓：「我𣍐刣大闢。」
19:7 約拿單叫大闢來，將這一切的經過攏給伊講。約拿單導大闢去見掃羅；大闢就繼續侍候掃羅。
19:8 戰爭閣爆發；大闢出去及非利士人交戰，給𪜶徹底拍敗，𪜶就逃走。
19:9 有一日，掃羅坐佇厝內，手裡攑槍，對上主遐來的歹神閣臨到伊；彼時大闢啲彈琴。
19:10 掃羅用槍射大闢，欲給伊釘佇壁裡；大闢閃開，彼支槍鑿入壁裡。彼暝，大闢逃走，離開。
19:11 掃羅派人去大闢的厝監視，按算透早欲給伊刣。大闢的某米甲對伊講：「你今暗若無逃命，明仔載一定會互人刣死。」
19:12 米甲就對窗仔給大闢縋落去；伊就逃走去匿。
19:13 米甲用家族神像下佇眠床，用山羊毛蓋頭殼，用外衫給伊蓋啲。
19:14 掃羅派人去掠大闢；米甲給𪜶講：「伊啲破病。」
19:15 掃羅閣派人去，一定欲看著大闢，講：「連眠床續扛來我遮，我欲互伊死。」
19:16 使者入去，看著眠床有家族神像，頭殼蓋山羊毛。
19:17 掃羅對米甲講：「你是按怎騙我，放我的對敵逃走？」
米甲應講：「伊給我講：『放我走。若無，我欲給你刣死。』」
19:18 大闢逃走，去拉瑪見撒母耳，將掃羅對伊所做的代誌攏給撒母耳講。伊及撒母耳就去住佇拿約。
19:19 有人給掃羅講：「大闢佇拉瑪的拿約。」
19:20 掃羅派使者去掠大闢；𪜶看著撒母耳做頭導一陣先知入神講話，上帝的神臨到掃羅的使者，𪜶嘛開始入神講話。
19:21 有人將此個代誌給掃羅講，伊閣派使者去，𪜶嘛入神講話。掃羅第三遍派使者去，𪜶嘛入神講話。
19:22 後來伊本身嘛去拉瑪，到西沽的彼個大鼓井遐，問人：「撒母耳及大闢佇叨位？」有人給伊講：「𪜶佇拉瑪的拿約。」
19:23 掃羅就去拿約；上帝的神嘛臨到伊；伊那行那入神講話，一直到拿約。
19:24 伊甚至褪衫，佇撒母耳的面前入神講話，歸暝歸日褪裼倒啲。因為按呢，人講：「連掃羅嘛啲做先知噢？」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。