上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
以色列人要求設立王
8:1 撒母耳已經老，就設立伊兩個子做以色列的士師。
8:2 大子約珥及第二子亞比雅攏佇別是巴做士師。
8:3 毋拘𪜶無學𪜶老父的模樣；𪜶貪不義之財，收賄賂，無照公道裁決。
8:4 對按呢，以色列的長老攏聚集來拉瑪見撒母耳，
8:5 給伊講：「你已經年老，你兩個子無學你的模樣。所以著設立一個王給阮治理，親像別個國家仝款。」
8:6 撒母耳對𪜶要求一個王的事無歡喜。伊就對上主祈禱。
8:7 上主對撒母耳講：「人民的要求，你著接受。𪜶毋是棄拺你，是棄拺我；𪜶無愛我做𪜶的王。
8:8 對我導𪜶出埃及到今仔日，𪜶所做的攏是離開我，去服事別個神明，現在𪜶嘛按呢啲對待你。
8:9 今𪜶的要求你著接受，毋拘著嚴嚴給𪜶警告，互𪜶知將來𪜶的王會按怎管轄𪜶。」
8:10 撒母耳將上主的話攏給許個對伊要求一個王的人民講：
8:11 「將來恁的王會按呢管轄恁：伊會召恁的子去作兵，有的做戰車兵，有的做馬兵；𪜶走做前，做王的先鋒。
8:12 伊會派人做官長，有的管一千，有的管五十；嘛會派人給伊作園，收成五穀，造軍器及戰車的裝備。
8:13 伊會召恁的查某子給伊製造芳油，煮食，烘餅。
8:14 伊會給恁上好的田園、葡萄園、橄欖園提去互伊的人臣。
8:15 恁的五穀及葡萄，伊會取十分一互伊的官員及人臣。
8:16 伊會掠恁的奴僕、女婢、勇壯的少年人，及恁的驢仔，給伊做工。
8:17 恁的羊群，伊欲取十分一；恁嘛會做伊的奴隸。
8:18 彼時，恁會因為所揀的王哀叫，毋拘上主毋插恁。」
8:19 毋拘人民毋聽撒母耳的話，反轉應講：「你講的，阮無贊成！阮一定欲有一個王治理阮。
8:20 按呢阮才會親像別國有家己的王給阮治理，導阮去交戰。」
8:21 撒母耳聽著人民的話了後，就講互上主聽。
8:22 上主對撒母耳講：「你著聽𪜶的要求，給𪜶設立一個王。」撒母耳就給以色列人講：「恁通倒去。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。