上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
約櫃互人搶去
4:1 撒母耳的話傳遍以色列。
以色列人出去欲及非利士人交戰；𪜶佇以便‧以謝附近紮營，非利士人佇亞弗紮營。
4:2 非利士人排陣攻擊以色列人，𪜶刣贏，刣死以色列人大約四千人。
4:3 以色列軍隊倒來營內，𪜶的長老講：「是按怎上主今仔日互咱刣輸非利士人？咱來去示羅扛上主的約櫃來咱遮，按呢伊佇咱中間，會救咱脫離對敵的手。」
4:4 𪜶就派人去示羅，將上主 — 萬軍的統帥的約櫃扛來，因為上主坐佇約櫃頂面兩個天使基路伯的中間。以利兩個子何弗尼、非尼哈，及上帝的約櫃做夥來。
4:5 上主的約櫃來到營中的時，以色列人大聲喝，地煞振動。
4:6 非利士人聽著喊喝的聲，就講：「希伯來營中赫呢大聲，是啲喝什麼？」後來才知是上主的約櫃到營中。
4:7 非利士人驚惶，講：「有神明來到𪜶的營中。」𪜶講：「慘啊，咱前到今毋曾抵著此款代誌。
4:8 咱慘啊，啥人會當救咱脫離此款大權能的神明？以前佇曠野用逐款災禍拍死埃及人的，就是諸個神明。
4:9 非利士人啊，著勇敢，著做大丈夫，恁才免做希伯來人的奴隸，親像𪜶以前做咱的奴隸。著做大丈夫及𪜶交戰。」
4:10 非利士人就出戰，以色列人戰敗；步兵死三萬人，其他的攏逃走轉去𪜶兜。
4:11 上帝的約櫃互非利士人搶去；以利兩個子何弗尼及非尼哈嘛攏死。
以利死
4:12 仝彼日，有一個便雅憫支族的人對戰場走來示羅，衫拆裂，頭殼糝土粉表示哀傷。
4:13 伊到的時，抵好以利佇路邊坐佇伊的椅仔啲看，因為伊啲掛慮上帝的約櫃。彼個人入城報消息，全城的人攏喉叫。
4:14 以利聽著喉叫的聲，就問：「𪜶啲喝什麼？」彼個人趕緊來給以利報告。
4:15 彼時以利已經九十八歲，目睭柴柴，無看見。
4:16 彼個人給以利講：「我抵仔對戰場來，對戰場逃走來。」
以利講：「我的子，代誌按怎？」
4:17 報消息的應講：「以色列人戰敗逃走，互人刣死的真多。你兩個子，何弗尼及非尼哈嘛死。上帝的約櫃互人搶去。」
4:18 彼個人一下講著上帝的約櫃，以利就對椅仔倒摔向，倒落去門邊，頷頸折，就死；因為伊年老閣大箍。以利做以色列的士師四十年。
非尼哈的某死
4:19 以利的新婦，非尼哈的某，懷孕啲欲生。伊聽著上帝的約櫃互人搶去，大官及丈夫攏死的消息，忽然催陣痛疼，屈落去生子。
4:20 伊啲欲死的時，佇邊仔啲照顧的婦仁人給伊講：「免驚，你生查甫的！」毋拘伊恬恬，無回應。
4:21 伊給囝仔號名叫「以迦博」，意思是上帝的榮耀已經離開以色列；因為上帝的約櫃互人搶去，大官及丈夫嘛攏死。
4:22 伊閣講：「榮耀已經離開以色列，因為上帝的約櫃互人搶去。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。