上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
以撒祝福雅各
27:1 以撒年老，目睭花，𣍐看見，就叫伊的大子以掃來，給伊講：「我的子啊。」
伊應講：「我佇遮。」
27:2 以撒講：「我真老啦，毋知叨一日欲死。
27:3 今攑你拍獵的傢俬，就是箭袋及弓，去野地給我拍獵，
27:4 照我愛的口味煮來互我食，互我佇猶未死以前給你祝福。」
27:5 麗百加有聽著以撒對伊的子以掃講的話。以掃出去野地拍獵，欲帶獵物倒來；
27:6 麗百加對伊的子雅各講：「我有聽著恁老父給你的兄哥以掃講：
27:7 『你去掠獵物倒來，煮互好食，捧來互我；我欲佇猶未死以前，佇上主的面前給你祝福。』
27:8 今，我的子，你著聽我的話，照我給你講的去做。
27:9 你去羊群遐，掠兩隻肥的山羊仔子來；我欲照恁老父合意的口味煮互伊食。
27:10 你捧去互恁老父食，通互伊佇猶未死以前給你祝福。」
27:11 雅各對伊的老母麗百加講：「毋拘我的兄哥以掃身軀有毛，我的皮膚光滑。
27:12 我的老父若摸著我，會知我啲給伊騙；我毋若𣍐當得著伊的祝福，顛倒受伊咒詛。」
27:13 伊的老母講：「我的子啊，你若受咒詛，我來承擔。做你聽我的話，去掠羊仔來互我。」
27:14 雅各就去掠羊仔來互伊的老母；伊的老母就照伊的老父合意的口味料理。
27:15 麗百加閣挔大子以掃收佇厝內上好的衫，互伊的細漢子雅各穿。
27:16 伊閣用山羊仔的皮，包雅各的手及頷頸光滑的所在。
27:17 然後，將伊煮的料理及餅，交互伊的子雅各。
27:18 雅各去𪜶老父遐，講：「阿爸。」
以撒講：「我佇遮。我的子，你是叨一個？」
27:19 雅各對伊的老父講：「我是你的大子以掃。我已經照你吩咐的去做。請起來坐，食我拍著的獵物；食飽通給我祝福。」
27:20 以撒對伊的子講：「我的子，你哪會即緊就拍著？」
雅各應講：「因為上主 — 你的上帝互我真好運。」
27:21 以撒給雅各講：「我的子，行較倚來；我欲摸你，看你豈真正是我的子以掃？」
27:22 雅各就倚近伊的老父以撒。以撒就摸伊，講：「聲，是雅各的聲；手，是以掃的手。」
27:23 以撒分𣍐清楚，因為雅各的手有毛，親像伊的兄哥以掃，就給伊祝福。
27:24 閣講：「你豈真正是我的子以掃？」
雅各講：「我是。」
27:25 以撒講：「你拍著的獵物捧來互我食，我通給你祝福。」雅各就捧互伊食，閣提酒互伊飲。
27:26 伊的老父以撒對伊講：「我的子，倚來給我唚。」
27:27 雅各就進前唚伊的老父；伊的老父鼻著伊的衫的味，就給伊祝福講：
我的子的味，
親像上主賜福的田園的味。
27:28 願上帝賞賜你天頂的甘露，
互你的土地肥媠，
五穀及新酒真多。
27:29 願萬民服事你，
列國跪拜你；
願你統治你的兄弟，
你的老母的子跪拜你；
咒詛你的受咒詛，
祝福你的受祝福。
以掃求以撒祝福
27:30 以撒給雅各祝福了，雅各對伊的老父以撒遐出來的時，伊的兄哥以掃抵抵拍獵倒來。
27:31 伊嘛煮好食的料理，捧來互伊的老父，講：「阿爸，請起來食子拍著的獵物，食飽通給我祝福。」
27:32 伊的老父以撒給伊講：「你是什麼人？」
伊講：「我是你的大子以掃。」
27:33 以撒大驚，皮皮惙，講：「抵即彼個是啥人？彼個人佇你猶未來以前，捧獵物互我食，我食了就給伊祝福；伊一定會得著福氣。」
27:34 以掃一下聽著老父的話，開聲叫苦大哭，對伊的老父講：「阿爸，你嘛著給我祝福。」
27:35 以撒講：「你的小弟已經用詭計搶你的福分。」
27:36 以掃講：「伊叫做雅各，豈毋是真合？伊騙我兩遍：搶我大子的名份，此遍閣搶我的福分。」以掃閣講：「你豈無閣有什麼通給我祝福？」
27:37 以撒應以掃講：「我已經設立伊做你的主，互伊的親族服事伊；閣用五穀新酒養飼伊。我的子，我猶會當給你做什麼？」
27:38 以掃給伊的老父講：「阿爸，你的祝福豈干焦一種？阿爸，我，你嘛著給我祝福。」以掃開聲大哭。
27:39 伊的老父以撒應伊，講：
你無肥媠的土地通徛起，
嘛無天頂的甘露通潤澤。
27:40 你欲倚靠刀劍度活，
閣欲服事你的小弟；
到你強盛的日，
欲對你的頷頸幌掉伊的軛。
27:41 以掃因為雅各得著老父的祝福，就怨恨雅各；心內講：「阮老父啲欲過身，等喪事辦了，我欲刣死我的小弟雅各。」
27:42 有人將大子以掃的計劃給麗百加講，麗百加就差人去叫伊的細漢子雅各來，給伊講：「恁兄哥以掃欲刣你，消伊的怨恨。
27:43 今，我的子，著聽我的話；趕緊走去哈蘭恁阿舅拉班遐；
27:44 及伊住一段時間，聽候恁兄哥的受氣消。
27:45 到恁兄哥受氣煞，𣍐記得你對伊所做的代誌，彼時我才差人去導你倒來。我哪著一日內失去兩個子？」
雅各逃走去倚拉班
27:46 麗百加對以撒講：「我因為以掃娶此兩個赫人的查某子，活甲真艱苦。雅各若閣娶此所在赫人的查某囝仔，我活啲有啥意思？」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。