上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
路得記
拿俄美為著路得尋歸屬
3:1 路得的大家拿俄美給伊講：「查某子啊，我應該為著你尋一個好的歸屬，互你有家己的家。
3:2 你會記得無，及你做夥作工許個女工的頭家波阿斯，是咱的親成？我給你講，今暝伊會佇五穀場簸大麥。
3:3 你著洗身軀，抹芳油，穿媠衫，然後落去五穀場；毋拘彼個人食飽飲煞以前，毋通互伊認著。
3:4 伊倒落去睏的時，著看清楚伊倒的所在，然後倚去，掀開伊蓋腳的外袍，倒佇伊身邊。伊會給你講你著做的事。」
3:5 路得應伊講：「你給我講的，我攏會去做。」
3:6 伊就落去五穀場，照大家所吩咐的一切去做。
3:7 波阿斯食飽飲煞，感覺真爽快，就去倒佇麥堆邊。路得就跕腳去，掀開伊蓋腳的外袍，倒佇伊的身邊。
3:8 半暝，波阿斯翻身，看著一個查某人倒佇腳邊，著一驚。
3:9 伊問講：「你是啥人？」
伊應講：「我是你的女婢路得，請你用外衫來蓋你的女婢，致蔭我，因為你是阮的至親，有義務延續阮的世系。」
3:10 伊講：「查某子，願你得著上主的祝福。你現在所表現的忠誠比以前閣較大；無論散赤抑是好額的少年人，你攏無及𪜶行。
3:11 今，我的查某子，免煩惱，你所講的我攏會替你做，因為全城的人攏知你是好德行的查某人。
3:12 我確實是你的至親，有義務延續你的世系，毋拘有一個比我及恁閣較親。
3:13 今暝你留𫢶遮，等天光，伊若欲對你盡義務，真好，互伊盡；伊若毋，我指永活的上主咒誓，我一定會盡義務。你𫢶遮睏，到天光。」
3:14 路得就佇伊的腳邊睏，到天昲光。佇人面猶認𣍐清楚以前，路得就起來，因為波阿斯有講：「毋通互人知有查某人來五穀場。」
3:15 波阿斯講：「給你的袚巾提來，搋互開。」伊就搋開。波阿斯量約二十公斤的大麥，囥佇路得的肩頭頂，伊就入城。
3:16 路得來到伊的大家遐。拿俄美問伊講：「查某子啊，代誌啥款？」
路得就將彼個人對伊所做的一切攏給伊講。
3:17 路得講：「彼個人給我講：『你毋通空手轉去恁大家遐。』伊有互我此二十公斤大麥。」
3:18 拿俄美就講：「查某子啊，等看代誌按怎發展。今仔日代誌若無辦好勢，彼個人一定𣍐安心。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。