上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
路得記
路得抵著波阿斯
2:1 拿俄美有一個親成，名叫做波阿斯，是大財主，是伊的丈夫以利米勒的親族。
2:2 摩押的女子路得對拿俄美講：「我想欲去園裡，通隨佇對我親切的人後面拾麥穗。」
拿俄美就對伊講：「查某子啊，做你去。」
2:3 伊就去園裡，隨佇收割的人後面拾麥穗。真抵好，此坵園是以利米勒的親族波阿斯的。
2:4 抵彼時，波阿斯對伯利恆來，伊對收割的人講：「願上主及恁同在！」
𪜶就應伊講：「願上主賜福你！」
2:5 波阿斯問收割的工頭講：「此個少年查某囝仔是什麼人𪜶兜的？」
2:6 收割的工頭應講：「此個摩押的女子是隨拿俄美對摩押地轉來的。
2:7 伊有講：『准我佇收割的人後面拾落落來的麥穗。』伊對早起無閒到今，抵仔才佇寮仔歇睏一時仔若定。」
2:8 波阿斯就對路得講：「查某子啊，我給你講，毋通去別人的園拾，嘛毋通離開遮，著隨我的女工隨互牢。
2:9 看工人佇叨一坵園啲收割，著隨佇女工後面拾。我已經吩咐工人𣍐用得給你創治。你嘴焦的時，去水桶遐飲工人汲來的水。」
2:10 路得就仆落去，跪佇土腳，對伊講：「你哪會對我即呢好，即呢關心我此個外國人？」
2:11 波阿斯應伊講：「你的丈夫死了後，你對大家所做的一切，人攏給我講啦。你離開你的父母及故鄉，來住佇此個生份的人中間。
2:12 願上主照你所做的報答你。你來上主 — 以色列的上帝翼股下避難，願你對伊得著滿滿的報賞。」
2:13 路得應講：「你對我即呢好；雖然我做你的女婢嘛𣍐堪得，你猶久安慰我，閣對我 — 你的女婢輕聲講好話。」
2:14 食飯的時，波阿斯對伊講：「來遮，提起來食，麵包搵醋食。」路得就坐佇收割的人身邊。波阿斯提焙好的麥仔互伊。伊食飽，閣有賰。
2:15 伊𬦰起來，閣去拾麥穗。波阿斯就吩咐伊的工人，講：「伊若佇麥捆中拾，嘛毋通給伊擋，害伊見笑。
2:16 恁甚至著對麥捆中抽一寡出來互伊拾，毋通給伊責備。」
2:17 路得就佇園裡拾麥穗，拾到天暗。伊拍所拾的麥穗，大約有二十二公升的大麥。
2:18 伊就揹入城，提互伊的大家看，閣將食賰的提出來互伊的大家。
2:19 伊的大家對伊講：「你今仔日佇叨位拾麥穗？你佇叨位工作？願注意著你，好款待你彼個人受祝福。」
路得就給大家講伊佇什麼人遐工作，閣講彼個人名叫做波阿斯。
2:20 拿俄美對新婦講：「願波阿斯得著上主祝福；上主不時施恩互活人及死人。」拿俄美閣對伊講：「此個人是咱的親成，是有義務延續咱世系的一個至親。」
2:21 摩押的女子路得講：「伊嘛有給我講：『你著隨佇我的工人身邊到收割煞。』」
2:22 拿俄美就對伊的新婦路得講：「我的查某子啊，你著及伊的女工做夥，才免佇別人的園裡互人創治。」
2:23 路得就隨波阿斯的女工做夥拾五穀，到大麥小麥攏收割了。伊繼續及伊的大家住做夥。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。