上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
為便雅憫人尋某
21:1 以色列人佇米斯巴曾咒誓講：「阮無欲將查某子嫁互便雅憫人做某。」
21:2 以色列人來到伯特利，坐佇上帝的面前大聲啼哭到下昏，
21:3 講：「上主 — 以色列的上帝，今仔日佇以色列中間減一支族；阮以色列人哪會抵著此款代誌？」
21:4 隔日透早，人民起來，佇遐起一座壇，獻燒化祭及平安祭。
21:5 以色列人講：「佇以色列支族中，啥人無做夥來上主遮聚集？」因為𪜶咒重誓，講：「無來米斯巴上主的面前的人，著互伊死。」
21:6 以色列人為著𪜶的同胞便雅憫人心艱苦，講：「今仔日以色列中斷絕一個支族啦。
21:7 咱已經指上主咒誓，無欲將查某子嫁互𪜶，今咱欲對叨位為著𪜶所賰的人尋某？」
21:8 𪜶閣講：「以色列諸個支族中間，啥人無上來米斯巴上主遮？」𪜶就查出基列的雅比人無一個人來。
21:9 因為𪜶點算的時，無一個基列的雅比人佇遐。
21:10 會眾就差一萬兩千個勇士，吩咐𪜶講：「恁去基列的雅比，用刀刣死所有的查甫人、婦仁人，及囝仔。
21:11 恁著按呢做：著將所有的查甫人，及結婚過的查某人攏刣死。」
21:12 𪜶佇基列的雅比人中間抵著四百個猶未結婚的在室女，就給𪜶帶到迦南地示羅的軍營。
21:13 全體會眾就派人去及臨門巖的便雅憫人講和。
21:14 彼時，便雅憫人倒來；以色列人就將所留落來許個基列的雅比人的查某囝仔互𪜶做某；毋拘猶無夠。
21:15 以色列人民為著便雅憫人心艱苦；因為上主互以色列的支族缺一角。
21:16 以色列的長老講：「便雅憫的婦女既然已經受剿滅，今咱欲按怎尋某互許個活啲的人？」
21:17 閣講：「便雅憫所賰的人嘛著有家業互𪜶，才免以色列中一支族受除滅。
21:18 毋拘咱𣍐用得將家己的查某子互𪜶做某，因為咱以色列人有咒誓講：『將查某子嫁互便雅憫人的，著受咒詛。』」
21:19 𪜶閣講：「示羅逐年有舉行敬拜上主的節期。」示羅是佇利波拿的南旁，伯特利的北旁，就是伯特利向示劍的大路的東旁。
21:20 𪜶就教便雅憫人，講：「恁著去示羅，匿𫢶葡萄園；
21:21 若看著𪜶的查某囝仔出來跳舞，著對葡萄園出來，逐個人搶一個示羅的女子做某，才倒去便雅憫地區。
21:22 𪜶的老父抑是兄弟若來給阮抗議，阮會給𪜶講：『請恁帶念阮，寬容𪜶；因為交戰的時，阮無留查某囝仔互𪜶做某。今，毋是恁將查某子互𪜶；若是，恁就有罪。』」
21:23 便雅憫人就照按呢做，照𪜶的人額，搶跳舞的查某囝仔作某；然後倒去𪜶本地，重建城鎮，住佇遐。
21:24 像時，以色列人離開遐，逐個人倒去家己的支族、宗族；逐個人攏對遐離開，倒去𪜶本地。
21:25 彼時，以色列人無王，逐個人攏照伊看做著的去做。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。