上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
11:1 基列人耶弗他是強猛的勇士；伊的老母是妓女，老父是基列。
11:2 基列的某嘛給伊生幾若個子；諸個子大漢，就給耶弗他趕出去，講：「你𣍐用得分阮老父的財產，因為你是妓女生的。」
11:3 耶弗他就走閃伊的兄弟，去住佇陀伯地區；有一寡匪類倚來耶弗他遐，隨伊出入。
11:4 過一段時間，亞捫人及以色列人交戰。
11:5 亞捫人及以色列人交戰的時，基列的長老去陀伯地區請耶弗他倒來。
11:6 𪜶對耶弗他講：「請你倒來做阮的指揮官，導阮及亞捫人交戰。」
11:7 耶弗他應基列的長老講：「恁以前豈毋是討厭我，給我對阮老父的家趕出來？現在恁抵著患難，是按怎來尋我？」
11:8 基列的長老對耶弗他講：「就是因為按呢，阮現在倒轉來尋你。你若及阮做夥去及亞捫人交戰，你就通做阮的領袖，管轄基列所有的住民。」
11:9 耶弗他對基列的長老講：「恁若愛我倒去及亞捫人交戰，上主閣將𪜶交互我，我就欲做恁的領袖。」
11:10 基列的長老應耶弗他講：「上主作證，阮一定照你的話做。」
11:11 耶弗他及基列的長老倒去，人民就設立伊做領袖，做指揮官。耶弗他佇米斯巴將諸個一切的話對上主講一遍。
11:12 耶弗他差使者去見亞捫人的王講：「我及你有什麼冤仇，你竟然來侵佔阮的地？」
11:13 亞捫人的王應耶弗他的使者講：「以色列人對埃及上來的時，佔我的地，對亞嫩河到雅博河，閣到約旦河。今恁著乖乖仔將諸個地還我。」
11:14 耶弗他閣差使者去見亞捫人的王，
11:15 給伊講：「耶弗他按呢講：『以色列人並無佔摩押人及亞捫人的地。
11:16 以色列人對埃及上來的時，是經過曠野到紅海，來到加低斯；
11:17 彼時以色列人差使者去見以東王，請伊允准𪜶經過伊的地，毋拘以東王毋肯。𪜶閣差使者去見摩押王，伊嘛毋准；以色列人就住佇加低斯。
11:18 𪜶閣經過曠野，踅過以東地及摩押地的外面，來到摩押地的東旁，佇亞嫩河彼旁紮營；無入摩押的境內，因為亞嫩河是摩押的邊界。
11:19 以色列人閣差人去見亞摩利人希實本的王西宏，請伊允准𪜶經過伊的地，去𪜶家己的所在。
11:20 毋拘西宏無信任以色列人，毋互𪜶經過伊的境界，顛倒聚集伊的人民，佇雅雜紮營，及以色列人交戰。
11:21 上主 — 以色列的上帝將西宏及伊的人民交佇以色列人的手，以色列人就給𪜶拍敗；對按呢，以色列人就得著彼地區亞摩利人的全地做產業。
11:22 𪜶得著亞摩利人所有的土地，對亞嫩河到雅博河，對曠野到約旦河。
11:23 「『上主 — 以色列的上帝為著伊的子民以色列將亞摩利人趕走，你嘛欲佔此塊地是無？
11:24 你應該去佔領你的神明基抹賜互你的地。上主 — 阮的上帝賞賜阮的地，阮欲顧守。
11:25 你豈比摩押王西撥的子巴勒較強？伊毋敢及以色列人計較，嘛毋敢及𪜶交戰。
11:26 以色列人住佇希實本、亞羅珥，及𪜶附近的庄社，以及亞嫩河邊許個城，已經有三百年；彼時恁哪無給𪜶搶轉來？
11:27 我無得罪你，你顛倒欲及我交戰。願審判的上主今仔日佇以色列及亞捫的中間裁決。』」
11:28 毋拘亞捫人的王毋肯聽耶弗他派去的人對伊講的話。
11:29 上主的神臨到耶弗他，伊就經過基列及瑪拿西的地區，倒來基列的米斯巴，閣對米斯巴去到亞捫人遐。
11:30 耶弗他對上主下願，講：「你若將亞捫人交佇我的手，
11:31 我對亞捫人遐平安倒來的時，對阮兜的門出來迎接我的，無論啥人，我一定欲給伊獻做燒化祭歸上主。」
11:32 耶弗他去及亞捫人交戰，上主將𪜶交佇伊的手。
11:33 伊將亞捫人徹底拍敗，對亞羅珥到米匿，直到亞伯‧基拉明，攏總攻取二十座城，刣死真多人。對按呢，亞捫人就受以色列人制伏。
耶弗他的查某子
11:34 耶弗他倒來米斯巴到家己的厝，彼時，伊的查某子攑玲瓏鼓跳舞出來迎接伊；此個查某囝仔是伊孤生的查某子。
11:35 耶弗他看著伊，就拆裂衫，講：「唉啊，我的查某子，你互我真為難，互我真艱苦心；因為我已經對上主講出嘴，𣍐當收回。」
11:36 伊應講：「阿爸，你已經對上主下願，著照你所講的對我按呢做；因為上主已經佇你的對敵亞捫人身上替你報仇。」
11:37 伊閣對伊的老父講：「有一項代誌求你允准，請容允我兩個月，互我及我的同伴去山裡，為著我著一世人做在室女啼哭。」
11:38 耶弗他講：「好，你去！」耶弗他就准伊去兩個月，及伊的同伴佇山裡為著伊一世人做在室女啼哭。
11:39 兩月日後，伊倒來伊的老父遐，伊的老父就照所下的願對待伊；伊攏無結婚。後來，以色列有一個風俗：
11:40 逐年有四日，以色列的查某囝仔會出去追悼基列人耶弗他的查某子。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。