上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
猶大及西緬支族掠亞多尼‧比色
1:1 約書亞死了後，以色列人請問上主，講：「阮叨一個支族著代先去攻打迦南人？」
1:2 上主講：「猶大支族先去。我已經將彼個地交佇𪜶的手。」
1:3 猶大人對𪜶的親族西緬人講：「請恁及阮做夥去阮抽著的土地，及迦南人交戰；阮嘛會按呢及恁去恁抽著的地做夥交戰。」西緬人就及𪜶做夥去。
1:4 猶大人就出戰；上主將迦南人及比利洗人交佇𪜶的手；𪜶佇比色刣死一萬人。
1:5 𪜶佇比色抵著亞多尼‧比色，及伊交戰，刣贏迦南人及比利洗人。
1:6 亞多尼‧比色逃走，𪜶追趇伊，給伊掠著，斬斷伊的手及伊的腳的大頭姆。
1:7 亞多尼‧比色講：「以前有七十個王，腳手的大頭姆攏互我斬起來，佇我的桌腳拾食物；今上帝照我所做的報應我。」猶大人帶伊去耶路撒冷；伊就死佇遐。
攻取耶路撒冷及希伯崙
1:8 猶大人攻取耶路撒冷，用刀刣死城內的人，閣放火燒城。
1:9 後來，𪜶閣落去攻打住佇山區、尼革夫，及山埔的迦南人。
1:10 猶大人閣攻打許個住佇希伯崙的迦南人，刣死示篩、亞希幔、達買；希伯崙以前叫做基列‧亞巴。
俄陀聶征服底璧
1:11 ( 書 15:15-19 )
猶大人對遐去攻擊底璧的住民。底璧以前叫做基列‧西弗。
1:12 迦勒講：「什麼人攻取基列‧西弗，我就將我的查某子押撒互伊作某。」
1:13 迦勒的小弟基納斯的子俄陀聶攻取此個城，迦勒就將查某子押撒互伊作某。
1:14 押撒出嫁彼日，俄陀聶叫伊著給伊的老父討一坵園。押撒對驢仔落來；迦勒問伊講：「你欲愛什麼？」
1:15 押撒講：「請你互我一份禮物。你有互我一塊南旁的焦地，請閣互我水泉。」迦勒就將頂下兩個水泉攏互伊。
猶大及便雅憫支族的勝利
1:16 摩西的丈人是基尼人，伊的後代及猶大的後代對棕樹城耶利哥做夥去亞拉得南旁猶大的曠野，及遐的人做夥住。
1:17 猶大人及𪜶的親族西緬人做夥拍敗住佇洗法的迦南人，將城完全毀滅；彼個城就叫做何珥瑪。
1:18 猶大人閣攻取迦薩、亞實基倫、以革倫及𪜶周圍的土地。
1:19 上主及猶大人同在，𪜶就佔領山區；毋拘𪜶𣍐當給住佇沿海平地的住民趕出去，因為許個人有鐵的戰車。
1:20 𪜶照摩西的吩咐，將希伯崙互迦勒，伊就對遐趕出亞衲後代三個族。
1:21 便雅憫人無將耶布斯人對耶路撒冷趕出去；𪜶就及便雅憫人做夥住佇耶路撒冷，直到今仔日。
以法蓮及瑪拿西支族征服伯特利
1:22 約瑟家，就是以法蓮及瑪拿西兩個支族，攻打伯特利；上主及𪜶同在。
1:23 𪜶派人去探查伯特利；彼個城以前叫做路斯。
1:24 偵探看著一個人對城內出來，就對伊講：「請給阮講，欲按怎入此個城；阮會好好仔對待你。」
1:25 彼個人就報𪜶入城的路。𪜶刣死城內的住民，只有放彼個人及伊全家。
1:26 彼個人去赫人的地區，起一座城，給伊號名叫做路斯；到今仔日此個城猶叫此個名。
以色列人無趕出的人民
1:27 瑪拿西人無趕出伯‧善、他納、多珥、以伯蓮、米吉多，及諸個城附近庄社的住民；迦南人堅持繼續住佇諸個所在。
1:28 以色列人強盛的時，就互迦南人做苦工，無全部給𪜶趕走。
1:29 以法蓮人無給住佇基色的迦南人趕出去；迦南人繼續及𪜶住佇基色。
1:30 西布倫人無給住佇基倫及拿哈拉的人趕出去。迦南人繼續及𪜶做夥住，做苦工。
1:31 亞設人無趕出亞柯、西頓、亞黑拉、亞革悉、黑巴、亞弗革，及利合的住民。
1:32 亞設人及迦南人做夥住，無給𪜶趕走。
1:33 拿弗他利人無趕出伯‧示麥及伯‧亞納的住民。𪜶及彼所在的迦南人做夥住；毋拘伯‧示麥及伯‧亞納的住民攏為𪜶做苦工。
1:34 亞摩利人強迫但的人住佇山區，不准𪜶落去平原。
1:35 亞摩利人繼續住佇希列斯山、亞雅崙及沙賓；約瑟家強盛的時，就互𪜶做苦工。
1:36 亞摩利人的地界，對亞克拉濱山坪到西拉北旁。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。