上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約書亞記
攻取艾城
8:1 上主對約書亞講：「毋通驚，毋通懍。你起來，導攏總的戰士去攻擊艾城；我已經將艾城的王，及伊的人民、伊的城、伊的土地攏交互你啦。
8:2 你按怎對待耶利哥及伊的王，嘛著按呢對待艾城及伊的王；毋拘恁搶著的財物及牲生，通做恁的戰利品。你著派兵埋伏佇城的後面。」
8:3 對按呢，約書亞及全體的戰士攏起來，欲去攻取艾城。約書亞揀三萬個強猛的勇士，派𪜶暝時去，
8:4 吩咐𪜶，講：「恁著埋伏佇城的後面，毋通離城傷遠；攏著準備好勢。
8:5 我及我導的戰士欲向城進攻；𪜶會親像頂遍出來攻擊阮，彼時阮就欲佇𪜶的面前逃走。
8:6 𪜶會出來追趇阮，想講：『諸個人會親像頂遍佇阮的面前逃走。』所以阮欲佇𪜶的面前逃走，到阮引誘𪜶離開城。
8:7 彼時恁著對埋伏的所在起來，奪取彼個城，因為上主 — 恁的上帝會將此個城交佇恁的手。
8:8 恁佔領此個城了後，著用火燒城，照上主的話去做。注意，這是我的命令。」
8:9 約書亞派𪜶去，𪜶就去埋伏佇艾城的西旁，伯特利及艾城的中間。彼暝，約書亞及戰士做夥佇軍營歇睏。
8:10 隔日，約書亞透早起來，點算戰士；伊及以色列的長老佇人民的頭前出發去艾城。
8:11 及伊做夥的戰士，攏逼近城的頭前，佇艾城的北旁紮營；佇伊及艾城的中間有隔一個山谷。
8:12 伊有揀大約五千人埋伏佇艾城的西旁，伯特利及艾城的中間。
8:13 約書亞布置戰士，主力軍佇艾城的北旁，埋伏的兵佇城的西旁。彼暝約書亞進入山谷。
8:14 艾城的王看著，伊及城內的人透早趕緊出發，出去到亞拉巴頭前的戰場，欲及以色列人交戰；毋拘王毋知佇城的後面有兵埋伏。
8:15 約書亞及以色列的戰士佇𪜶的頭前假刣輸，對曠野的路逃走。
8:16 艾城所有的人民攏召集倚來追趇𪜶。𪜶追趇約書亞，就受引誘離開𪜶的城。
8:17 艾城及伯特利城全部的人攏出去追趇以色列人；城門放開開，去追趇以色列人。
8:18 上主對約書亞講：「你伸出手裡的槍指艾城；我欲將伊交互你。」約書亞就伸出手裡的槍指彼個城。
8:19 伊一下伸手，埋伏的兵就對𪜶的所在隨時起來，入去佔領彼個城，隨時放火燒。
8:20 艾城的人越頭一下看；看著城內火煙淐上天，就四界闖，毋知欲走去叨位。許個假輸走去曠野的以色列人，就翻頭來攻擊追趇𪜶。
8:21 約書亞及以色列的戰士看著埋伏的兵已經取城，城內火煙淐上高，就反擊刣死艾城的人。
8:22 埋伏的兵嘛出來攻擊𪜶；𪜶受以色列人包圍，攏互以色列人刣死；無一個活啲，無一個逃走。
8:23 以色列人活掠艾城的王，押伊去約書亞遐。
8:24 以色列人佇田野，佇曠野刣死所有趇𪜶的艾城戰士；𪜶閣倒轉來艾城，用刀刣死城內的人。
8:25 彼日艾城所有的人攏互𪜶刣死，男女共一萬兩千人。
8:26 艾城所有的人攏受剿滅，約書亞才收回伊攑槍的手。
8:27 以色列人就照上主命令約書亞的話，將城內的牲生及財物，攏搶來做家己的戰利品。
8:28 約書亞將艾城放火燒，互伊永遠做土堆，到今仔日猶荒廢。
8:29 伊閣將艾城的王吊佇樹頂，到黃昏；日落的時，伊下令，人才對樹頂收身屍落來，㧒佇城門口；佇彼頂面疊一大堆石頭，到今仔日猶留啲。
佇以巴路山宣讀律法
8:30 彼時，約書亞佇以巴路山，為上主 — 以色列的上帝起一座祭壇，
8:31 是照上主的僕人摩西對以色列人的命令，照摩西律法的冊記載的，用無經過鐵器拍過的歸粒石頭起的；𪜶佇此個壇頂獻燒化祭及平安祭互上主。
8:32 約書亞佇以色列人的面前將摩西的律法抄寫佇石頭頂。
8:33 所有的以色列人，無論是本族人抑是外族人，攏及𪜶的長老、官長，以及審判官，徛佇約櫃的雙旁，面向扛上主約櫃的利未人做祭司的，一半面對基利心山，一半面對以巴路山。約書亞照上主的僕人摩西以前所命令的，給以色列人民祝福。
8:34 然後，約書亞宣讀律法的冊所記載攏總祝福及咒詛的話。
8:35 摩西所命令一切的話，約書亞佇以色列的全體會眾，及婦仁人、囝仔，以及𪜶中間的外族人的面前，無一句無讀。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。