上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
亞伯拉罕買地埋葬莎拉
23:1 莎拉一生享受一百二十七歲。
23:2 莎拉死佇迦南地的基列‧亞巴，就是希伯崙。亞伯拉罕為著伊哀傷啼哭。
23:3 亞伯拉罕離開囥莎拉屍體的所在，去給赫人講：
23:4 「我是寄居佇恁遮的外族人，請恁互我一塊墓地，通安葬我的某。」
23:5 赫人應亞伯拉罕，講：
23:6 「先生，請聽：你佇阮遮是上尊貴的人物；出在你佇阮的墓地揀一塊上好的地，安葬你的某。阮無一個人會反對你佇阮的墓地安葬你的某。」
23:7 亞伯拉罕起來，對彼所在的赫人仆佇土腳行禮，
23:8 對𪜶講：「恁若肯互我安葬我的某，就請替我請求瑣轄的子以弗崙，
23:9 將伊土地尾溜的麥比拉洞賣互我；伊通照足額的價數賣我，互我佇恁中間有土地通做墓地。」
23:10 彼陣以弗崙及其他的赫人坐佇城門口；伊佇大家的面前應亞伯拉罕，眾人攏有聽著。伊講：
23:11 「毋通按呢，先生，請聽我講。彼塊地我送你，連內面的洞穴嘛互你。我佇我同胞的面前送互你，互你埋葬你的某。」
23:12 亞伯拉罕就仆佇土腳給當地的人行禮，
23:13 佇大家的面前應以弗崙，眾人攏有聽著。伊講：「請聽我講。我欲給你買彼塊地，請你著給我收錢，互我通佇遐安葬我的某。」
23:14 以弗崙應亞伯拉罕講：
23:15 「先生，請聽我講。彼塊地值四百塊銀，此個價數對咱兩個豈有算什麼？你通安葬你的某。」
23:16 亞伯拉罕聽以弗崙的話，照伊佇赫人的面前所講的，將買賣通用的銀，算四百塊互以弗崙。
23:17 對彼時起，以弗崙佇幔利對面麥比拉洞彼塊地，包括彼坵園、彼內面的洞穴，及四圍所有的樹木攏歸屬亞伯拉罕。
23:18 佇城門口的赫人攏作證，彼塊地歸屬亞伯拉罕。
23:19 後來，亞伯拉罕將伊的某莎拉安葬佇迦南地幔利對面麥比拉田野的洞穴；幔利就是希伯崙。
23:20 對按呢，彼坵園及園裡的洞穴，對赫人移轉互亞伯拉罕做私人墓地。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。