上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
2:1 天地及萬象已經創造完成。
2:2 佇第七日，上帝完成伊的工作，就佇彼日歇睏。
2:3 上帝賜福第七日，定此日做聖日；因為佇此日，上帝停伊一切創造的工，就安歇。
2:4 這就是天及地創造的過程。
創造的另外一個記載
主上帝造天及地的時，
2:5 大地猶未有草木，田野猶未生菜蔬；因為主上帝無落雨，嘛猶未有人通種作。
2:6 總是有水對地淐出來，潤澤地面。
2:7 主上帝用地上的土粉捏造人，對伊的鼻孔歕性命的氣；人就成做有性命的人。
2:8 主上帝佇東方的伊甸開墾一個園，將所造的人下佇彼內面。
2:9 主上帝互地發逐種好看的樹仔，及好食的果子；佇園的中間嘛有活命樹，及會互人分別善惡的樹。
2:10 有一條河對伊甸流出來，灌沃彼個園；對遐分做四條。
2:11 頭一條叫做比遜河，踅哈腓拉全地；遐出產金，
2:12 是上好的金；閣出產珍貴的芳料及紅瑪瑙。
2:13 第二條叫做基訓河，踅古實全地。
2:14 第三條叫做底格里斯河，流對亞述的東旁。第四條就是幼發拉底河。
2:15 主上帝將彼個人安頓佇伊甸園，互伊種作，顧守彼個園。
2:16 主上帝吩咐彼個人講：「園內逐種樹的果子，你攏通食。
2:17 毋拘彼欉會互人分別善惡的樹，伊的果子你𣍐用得食；你若食，彼日你一定會死。」
2:18 主上帝講：「彼個人家己一個住毋好；我欲給伊造一個幫贊者來匹配伊。」
2:19 主上帝用土做野地逐款的走獸，以及空中逐款的飛鳥。主上帝給許個動物導來彼個人的面前，互伊給𪜶號名；彼個人給逐款動物號的名，就成做彼個動物的名。
2:20 彼個人就給所有的牲生、空中的飛鳥，及野地一切的走獸號名，毋拘尋無一個通做伊的幫贊者來匹配伊。
2:21 主上帝互彼個人睏重眠，伊就睏。主上帝對彼個人提一支脇骨，閣互彼位的肉合起來。
2:22 主上帝就用彼支脇骨造一個查某人，導伊來到彼個人遐。
2:23 彼個人講：
「此個才是我骨內的骨，
肉內的肉；
通稱伊做查某人，
因為伊是對查甫人提出的。」
2:24 按呢，人欲離開伊的父母，及伊的某結連，兩人成做一體。
2:25 翁某兩人赤身露體，無感覺見笑。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。