上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
奉獻頭水的土產
26:1 恁承接上主 — 恁的上帝賞賜恁做產業的地來徛起的時，
26:2 著對上主 — 恁的上帝賞賜恁的地，將所收成逐項起頭熟的土產，提一寡下佇籃仔，去上主 — 恁的上帝揀選互恁服事伊的所在。
26:3 恁著去見值班的祭司，給伊講：「我今仔日對上主 — 我的上帝宣認，我已經來到上主對阮的列祖立誓賞賜阮的地。」
26:4 祭司就將你的籃仔接去，下佇上主 — 你的上帝的祭壇前。
26:5 你著佇上主 — 你的上帝面前告白講：「我的祖先是一個四界流浪的亞蘭人，落去埃及，佇遐寄居，人額少少；後來佇遐成做一個大閣強、人額多的民族。
26:6 埃及人苦楚阮，欺壓阮，強迫阮做苦工，
26:7 阮就哀求上主 — 阮列祖的上帝。上主聽見阮的聲，看見阮的困境、阮的勞苦、阮受的壓迫，
26:8 上主就伸出大氣力的手，用大閣通驚的事及神跡奇事，導阮出埃及；
26:9 閣導阮到此所在，將此個流奶及蜜的地賞賜阮。
26:10 今，上主，你賞賜互我此個地起頭熟的土產，我已經帶來奉獻互你。」
了後，你著將許個祭物下佇上主 — 你的上帝面前，佇遐敬拜伊。
26:11 你及利未人，以及恁中間的外族人，著因為上主 — 你的上帝賞賜你及你的家眷一切的福分來慶祝。
26:12 逐遍到第三年，就是奉獻十分一的年，著將一切土產的十分一分互利未人、外族人，及孤兒寡婦，互𪜶佇你的城鎮通得著飽足，
26:13 按呢你通對上主 — 你的上帝講：「我已經照你所命令我一切的誡命，對我的家將奉獻的物提出，互利未人、外族人，及孤兒寡婦；你的誡命我無違背，嘛無𣍐記得。
26:14 厝內有喪事的時，我無食奉獻的物；禮儀上無清氣的時，我無給諸個提出去，嘛無將諸個獻互死人；我有遵守上主 — 我的上帝所有命令我的話。
26:15 求你對天頂，你徛起的聖所，俯落看，賜福你的子民以色列及你賞賜阮的地，就是你對阮的列祖立誓所互阮此個流奶及蜜的地。」
上主的子民
26:16 今仔日上主 — 恁的上帝吩咐恁遵守諸個規例及命令，所以恁著盡心盡性切實遵行。
26:17 今仔日恁已經宣認上主做恁的上帝，欲行伊的道路，遵守伊的規例、誡命，及命令，閣欲聽趁伊的話。
26:18 上主今仔日嘛照伊對恁的應允，承認恁做伊特別的子民，互恁守伊一切的誡命；
26:19 閣欲照伊的應允，互恁得著謳咾、名聲、尊貴，超過伊所創造的萬族，互恁成做歸屬上主 — 恁的上帝聖潔的子民。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。