上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
離婚及再婚的條例
24:1 若有人娶某了後，知某有見笑事，無愛伊，就通寫離婚書互伊，叫伊離開。
24:2 伊離開彼個家了後，通嫁別人。
24:3 若是伊後來的丈夫無愛伊，閣寫離婚書互伊，教伊離開；抑是彼個丈夫死去，
24:4 彼個以前教伊離開的丈夫𣍐用得佇伊受拍垃墋了後，叫伊轉來，閣娶伊作某，因為這是上主厭惡的；毋通佇上主 — 恁的上帝賞賜恁做產業的地犯罪。
其他的條例
24:5 抵娶某的人毋通去交戰，嘛毋通互伊擔任公務；著互伊佇家內清閒一年，互伊的某歡喜快樂。
24:6 毋通提別人的石磨，抑是石磨的頂礅做抵押；因為這就是提人的性命做抵押。
24:7 若發見有人劫以色列中一個同胞，給伊當做奴隸對待，抑是給伊賣去，彼個劫人的人著互死；按呢，就對恁中間除去彼個邪惡的事。
24:8 對痲瘋病，恁著特別細膩；利未人做祭司的所教示恁，就是我所命令恁的，著切實遵行。
24:9 著會記得，恁早前出埃及的時，上主 — 恁的上帝佇路裡按怎對待美莉安。
24:10 恁無論有什麼物件借厝邊，毋通入去𪜶兜提物件抵押；
24:11 著徛佇外面，聽候給恁借的人提抵押的物件出來互恁。
24:12 彼個人若散赤，恁毋通提伊的外衫做抵押㨮過暝；
24:13 日落的時，一定著將彼個抵押的物件還伊，互伊通用伊的外衫蓋啲睏；伊會給恁祝福，上主 — 恁的上帝嘛會看此項事做恁的好德行。
24:14 困苦散赤的工人，無論是恁的同胞，抑是住佇恁城內的外族人，恁毋通給𪜶欺負。
24:15 𪜶的工錢，日落以前著互𪜶，因為𪜶散赤，靠彼個錢啲度活；才免𪜶因為恁的所做給上主投，恁就有罪。
24:16 毋通因為子兒的所做給老父處死，嘛毋通因為老父的所做給子兒處死；逐個人著因為家己的罪死。
24:17 恁審判，毋通冤枉外族人及孤兒，嘛毋通提寡婦的外衫做抵押。
24:18 著會記得恁曾佇埃及做奴才，上主 — 恁的上帝有給恁對遐救出來；所以我命令恁著按呢做。
24:19 恁佇園裡收五穀，若有一捆𣍐記得，猶放佇園裡，毋通斡轉去提，著留互外族人及孤兒寡婦；按呢，上主 — 恁的上帝會佇恁所做一切的事，賜福恁。
24:20 恁拍恁的橄欖樹了後，毋通閣巡許個樹枝；著留互外族人及孤兒寡婦。
24:21 恁挽葡萄了後，賰的毋通閣挽；著留互外族人及孤兒寡婦。
24:22 著會記得恁曾佇埃及做奴才，所以我命令恁著按呢做。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。