上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
禁止加入上主的會的條例
23:1 性器官受傷抑是閹起來的人，𣍐用得加入上主的會。
23:2 私生子𣍐用得加入上主的會；伊的子孫到第十代，嘛𣍐用得加入。
23:3 亞捫人及摩押人𣍐用得加入上主的會；甚至到第十代，嘛𣍐用得加入，
23:4 因為恁出埃及的時，𪜶無佇路裡用食物及水迎接恁；閣倩美索不達米亞的比奪人，比珥的子巴蘭來給恁咒詛。
23:5 毋拘上主 — 恁的上帝無聽巴蘭，因為上主疼恁，將彼個咒詛變做祝福。
23:6 恁永遠毋通幫贊𪜶得著平安及繁榮。
23:7 毋通怨恨以東人，因為𪜶是恁的親族；毋通怨恨埃及人，因為恁曾寄居佇遐；
23:8 𪜶的子孫到第三代通加入上主的會。
保持軍營清氣的條例
23:9 恁出去紮營欲攻擊對敵的時，著避免互恁致到禮儀上無清氣的事。
23:10 恁中間若有人夢洩致到無清氣，伊著出去營外，毋通閣入來營內；
23:11 到欲暗的時，伊著用水洗身軀，到日落才通閣入營。
23:12 恁佇營外著規畫一個所在做便所。
23:13 恁的裝備著有托仔，互恁佇外面大小便的時，用來挖土，蓋恁所放的；
23:14 因為上主 — 恁的上帝佇恁的營內及恁同在，欲保護恁，將對敵交互恁，所以恁的兵營著保持聖潔；才免伊看見恁中間有污穢，就離開恁。
其他的條例
23:15 若有奴隸逃脫，走去恁遐，恁毋通將伊交轉去互伊的主人；
23:16 恁著互伊住佇伊所愛的所在，所揀的城，及恁做夥徛起；恁毋通給伊欺負。
23:17 以色列的男女毋通有人佇寺廟做妓女抑是孌童。
23:18 寺廟的妓女及孌童賺的錢，毋通帶入來上主 — 恁的上帝的聖殿謝願；因為此兩項攏是上主 — 恁的上帝厭惡的。
23:19 恁的同胞無論給恁借錢銀、食物，抑是會生利息的物件，攏毋通提利息；
23:20 外族人若給恁借，恁通提利息，毋拘借互恁的同胞就毋通給伊提；按呢，上主 — 恁的上帝會佇恁欲入去佔領的地，佇恁所做一切的事，賜福恁。
23:21 恁對上主 — 恁的上帝下願，謝願毋通延遲，因為上主一定會給恁討；恁若無謝願，就有罪。
23:22 恁若無下願，顛倒無罪。
23:23 恁所有親嘴對上主 — 恁的上帝甘心下的願，著切實遵守。
23:24 恁入去厝邊的葡萄園，通照恁所愛挽來食，毋拘毋通貯佇器具內。
23:25 恁入去厝邊猶未收割的麥園，通用手摘麥穗，毋拘毋通用鐮𠠝仔割。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。