上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
以撒出世
21:1 上主照伊以前所講的話眷顧莎拉，實現伊對莎拉的應允。
21:2 亞伯拉罕年老，到上帝對伊講的日期，莎拉懷孕，給伊生一個後生。
21:3 亞伯拉罕給莎拉為伊生的子號名叫做以撒。
21:4 以撒出世第八日，亞伯拉罕照上帝的命令，給以撒行割禮。
21:5 以撒出世的時，亞伯拉罕抵抵一百歲。
21:6 莎拉講：「上帝互我歡喜笑；所有聽著我生子的人，嘛會及我做夥笑。」
21:7 閣講：「啥人會當事先給亞伯拉罕講『莎拉會互囝仔食奶』？毋拘佇亞伯拉罕年老的時，我給伊生一個子。」
21:8 囝仔漸漸大漢，就斷奶。以撒斷奶彼日，亞伯拉罕辦桌請人客。
趕夏甲及以實瑪利離開
21:9 有一日，莎拉看著埃及人夏甲的子以實瑪利啲給伊的子以撒滾笑，
21:10 就對亞伯拉罕講：「著給此個女婢及伊的子趕出去；因為女婢的子𣍐當及我的子以撒做夥繼承家業。」
21:11 此項代誌互亞伯拉罕非常苦惱，因為以實瑪利嘛是伊的子。
21:12 上帝給亞伯拉罕講：「你毋通為著以實瑪利及你的女婢夏甲苦惱。莎拉對你講的話，你著聽，因為對以撒生的，才欲稱做你的後代。
21:13 講著你的女婢的子以實瑪利，我嘛欲互伊成做一國，因為伊嘛是你生的。」
21:14 亞伯拉罕透早起來，提餅及一皮袋的水互夏甲，下佇伊的肩頭頂，叫伊及囝仔攏出去。夏甲就出去，到別是巴的曠野煞迷路。
21:15 皮袋內的水飲了，夏甲就將囝仔放佇細欉樹腳。
21:16 伊家己行離開，大約有射一支箭的遠，及囝仔相對面坐啲。伊講：「我毋甘看囝仔死。」伊坐佇囝仔的對面，出聲大啼哭。
21:17 上帝聽著囝仔的聲；上帝的使者對天叫夏甲，講：「夏甲，你是按怎咧？毋免驚！上帝已經聽著囝仔啲哮的聲。
21:18 起來，嘛給你的囝仔抱起來；我欲互伊成做大國。」
21:19 上帝開夏甲的目睭，伊就看著水井。夏甲去到井邊，將皮袋入水入到滿，閣互囝仔飲。
21:20 上帝及囝仔同在；伊漸漸大漢，住佇曠野，成做真𠢕射箭的人。
21:21 伊住佇巴蘭的曠野；伊的老母對埃及給伊娶一個某。
亞伯拉罕及亞比米勒立約
21:22 彼時，亞比米勒及伊的軍長非各來給亞伯拉罕講：「你無論做什麼，上帝攏給你祝福。
21:23 你現在著指上帝對我咒誓，毋通欺負我、我的子，及我的後代；我按怎好款待你，你嘛著按呢好款待我，以及你所寄居此個地。」
21:24 亞伯拉罕講：「好，我咒誓。」
21:25 以前亞比米勒的僕人曾霸佔一口水井，亞伯拉罕為著此個代誌責備亞比米勒。
21:26 亞比米勒講：「啥人做此個代誌，我毋知；你嘛毋曾給我講，今仔日我才知。」
21:27 亞伯拉罕就將牛及羊送互亞比米勒；兩個人就立約。
21:28 亞伯拉罕閣將七隻母的羊羔另外圍佇別個所在。
21:29 亞比米勒問亞伯拉罕講：「你將七隻母的羊羔另外圍啲，是什麼意思？」
21:30 亞伯拉罕應講：「你著接受我此七隻母的羊羔，證實此口井是我挖的。」
21:31 所以彼個所在叫做別是巴，因為𪜶兩個人佇遐立約。
21:32 𪜶佇別是巴立約；亞比米勒就及伊的軍長非各轉去非利士地。
21:33 亞伯拉罕佇別是巴栽一欉柳樹，閣佇遐求叫上主 — 永活上帝的名。
21:34 亞伯拉罕佇非利士人的地寄居真久。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。