上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
22:1 恁若看著同胞的牛抑是羊迷路，毋通佯無看著，一定著互伊倒轉去恁的同胞遐。
22:2 恁的同胞若離恁真遠，抑是恁毋識伊，就著牽轉去恁兜，留佇恁遐，聽候恁的同胞來尋，才還伊。
22:3 恁的同胞若拍毋見驢，抑是衫，抑是其他的物件，毋通佯做無看著；恁若拾著，攏著照按呢做。
22:4 恁若看著同胞的驢抑是牛佇路裡跋倒，毋通佯無看著，一定著幫贊主人給牲生扭起來。
22:5 婦仁人毋通穿查甫人的衫，查甫人嘛毋通穿婦仁人的衫；所有按呢做的人，是上主 — 恁的上帝厭惡的。
22:6 恁若佇路裡看著鳥仔巢，無論佇樹頂抑是佇土腳，內面有鳥仔子抑是鳥仔卵，鳥母啲攔鳥仔子抑是孵卵，恁毋通掠鳥仔子續掠鳥母；
22:7 恁通掠鳥仔子，毋拘一定著放鳥母去；按呢恁就通享受福氣，食長歲壽。
22:8 恁若起新厝，著佇厝頂做欄杆，才免有人對遐跋落來摔死，恁就著承擔責任。
22:9 毋通佇葡萄園撒第二種種籽；若按呢做，葡萄及所撒種籽的收成攏歸聖所，𣍐當家己用。
22:10 毋通用牛及驢掛仝一個軛犁田。
22:11 毋通穿羊毛及幼麻合做夥織的衫。
22:12 恁幔的外衫，著佇四角頭做鬚。
處理婚姻糾紛的條例
22:13 人若娶某，及伊同房，後來無愛伊，
22:14 給伊誹謗，破壞伊的名聲，講：「我娶此個查某，及伊同房，發見伊毋是在室女。」
22:15 查某囝仔的父母著提查某子在室女的證據出來，帶去彼個城廣場的長老遐；
22:16 查某囝仔的老父著對長老講：「我將我的查某子互此個人作某，伊無愛伊。
22:17 伊誹謗我的查某子，講『我發見你的查某子毋是在室女』。恁看，這是阮查某子在室女的證據。」父母就將彼塊布排佇彼個城長老的面前。
22:18 彼個城的長老著給彼個人掠來處罰；
22:19 嘛著給伊罰一千一百四十公克的銀，交互查某囝仔的老父；因為伊有破壞以色列的在室女的名聲；查某囝仔猶原做伊的某，彼個人一世人𣍐用得給伊離婚。
22:20 此個人控告的若是事實，查某囝仔無在室女的證據，
22:21 𪜶著掠彼個查某囝仔去𪜶老父的厝的門口，城內的人著用石頭給伊抌死；因為伊佇以色列做見笑的事，佇𪜶老父的家行淫亂；按呢就對恁中間除去彼個邪惡的事。
22:22 若有人及別人的某睏，彼個查甫及彼個婦仁人攏著互死；按呢就對以色列的中間除去彼個邪惡的事。
22:23 若有在室女已經及人定婚，有查甫人佇城內抵著伊，及伊睏，
22:24 恁著掠此兩個人去廣場，用石頭給𪜶抌死；因為此個查某囝仔佇城內無喝救人，此個查甫人凌辱別人的某。按呢，恁就對恁中間除去彼個邪惡的事。
22:25 若有查甫人佇野外抵著已經定婚的查某囝仔，給伊強姦；干焦彼個給伊強姦的人著死。
22:26 毋拘毋通辦彼個查某囝仔，因為伊無應該死。此個查甫人做的代誌是親像人起來攻擊伊的厝邊，給伊刣死仝款；
22:27 伊佇野外抵著彼個已經定婚的查某囝仔，查某囝仔雖然喝救人，嘛無人救伊。
22:28 若有查甫人抵著猶未定婚的在室女，給伊掠啲，強姦，互人發見，
22:29 彼個給伊強姦的查甫人著提五百七十公克的銀，交互查某囝仔的老父，閣著娶伊做某，一世人𣍐用得給伊離婚，因為彼個查甫人已經給伊凌辱。
22:30 人毋通娶老父的某，拍垃墋伊的老父的眠床。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。