上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
有關未結案的謀殺案件
21:1 佇上主 — 恁的上帝賞賜恁做產業的地，若有人毋知互啥人刣死，倒佇野外，
21:2 恁的長老及審判官著對彼個人受刣的所在，量到四圍許個城；
21:3 離開屍體上近彼個城的長老，著對牛群取一隻毋曾做工，毋曾掛軛的細隻牛母；
21:4 彼個城的長老著牽彼隻牛母到有水啲流，毋曾種作的山谷，佇遐摃斷彼隻牛母的頷頸。
21:5 利未人的後代做祭司的嘛著來遐，因為上主 — 恁的上帝有揀選𪜶來服事伊，奉上主的名祝福，裁決所有相告及傷害的案件。
21:6 離開屍體上近彼個城所有的長老，著佇彼隻佇山谷中頷頸摃斷的細隻牛母的頂面洗手，
21:7 聲明講：「阮的手無流此個人的血，阮的目睭嘛無看著啥人刣伊。
21:8 上主啊，求你赦免你所解救的子民以色列，毋通互阮承擔流無辜的人的血的罪。」按呢，流彼個血的罪就得著赦免。
21:9 恁照按呢做上主看做著的事，就會對恁中間除去流無辜的人的血的罪。
娶女俘虜作某的條例
21:10 恁去及對敵交戰，上主 — 恁的上帝若互恁刣贏，掠𪜶做俘虜；
21:11 彼時，佇俘虜的中間，若看著面貌好看的女子，真合意，欲娶伊做某，
21:12 就通娶入門；伊著剃頭毛，修指甲，
21:13 褪去受掠的時穿的衫，佇你的厝為著家己的父母哀哭一月日，然後你通及伊同房；你就做伊的丈夫，伊做你的某。
21:14 後來你若無愛伊，著互伊離開，得著自由；絕對毋通給伊賣，毋通給伊當做女婢款待；因為你曾強迫伊及你結婚。
大子繼承權的條例
21:15 人若有兩個某，一個伊較愛，一個較無愛，兩個攏有給伊生子；大子是較無愛的某生的。
21:16 分財產的時，毋通將較愛的某生的子當做大子，無互較無愛的某生的子做大子。
21:17 著承認較無愛的某生的子做大子，將所有的財產分雙分互伊；因為伊是老父勇壯的時生的頭上子，大子的名份是伊的。
不孝子的處理條例
21:18 人若有子忤逆不孝，毋聽父母的話；𪜶給伊警戒，伊猶原毋聽，
21:19 伊的父母著給伊掠起來，拖去彼個城的廣場見長老，
21:20 給許個長老講：「阮此個子忤逆不孝，毋聽阮的話，貪食，好酒。」
21:21 彼個城的人攏著用石頭給伊抌死；按呢就對恁中間除去此款邪惡的事。以色列眾人聽著就會驚。
其他的條例
21:22 人若犯死罪，受處死吊佇柴架，
21:23 伊的身屍毋通吊佇柴架過暝，一定著佇彼日給伊埋葬，因為受吊死的人是上帝咒詛的。毋通給上主 — 恁的上帝賞賜恁做產業的地拍垃墋。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。