上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
戰爭的條例
20:1 恁出去及對敵交戰，看著𪜶的戰馬、戰車，以及軍兵比恁較多，毋免驚𪜶，因為導恁出埃及地的上主 — 恁的上帝及恁同在。
20:2 恁排陣的時，祭司著佇軍兵的面前宣布，
20:3 講：「以色列人，著注意聽！今仔日恁欲及對敵交戰。毋免驚，毋免懍，毋免恐惶，毋通因為𪜶皮皮惙，
20:4 因為上主 — 恁的上帝會及恁做夥去，為著恁及對敵交戰，互恁得著勝利。」
20:5 許個官長嘛著對軍兵宣布，講：「若有人起新厝猶未舉行奉獻禮，伊通倒去𪜶兜，才免伊死佇戰場，別人替伊奉獻。
20:6 若有人種葡萄，猶未收成，伊通倒去𪜶兜，才免伊死佇戰場，別人享受伊的果子。
20:7 若有人定婚，猶未娶，伊通倒去𪜶兜，才免伊死佇戰場，別人娶伊的未婚妻。」
20:8 官長著閣對軍兵宣布，講：「若有人驚惶恐惶，伊通倒去𪜶兜，才免伊影響全軍的士氣。」
20:9 官長對軍兵宣布了後，著指派軍官做頭導軍兵。
20:10 恁倚近城欲攻打的時，著互城內的住民有機會投降。
20:11 𪜶若接受，開城門，𪜶所有的住民攏著做苦工來服事恁。
20:12 𪜶若毋投降，欲及恁交戰，恁著給𪜶圍困。
20:13 上主 — 恁的上帝會將𪜶交佇恁的手，恁著用刀刣死𪜶所有的查甫人；
20:14 毋拘婦女、囝仔、牲生，及城內所有的物，恁通搶來做戰利品；恁搶來的物，是上主 — 恁的上帝賞賜恁的，恁通提去食，提去用。
20:15 許個離開恁真遠，毋是附近國家的城，恁著按呢對待𪜶。
20:16 許個住佇上主 — 恁的上帝賞賜恁做產業的地的民族，所有會喘氣的，恁毋通互𪜶活啲。
20:17 著照上主 — 恁的上帝的命令，將赫人、亞摩利人、迦南人、比利洗人、希未人、耶布斯人，全部消滅；
20:18 才免𪜶教恁做逐款可惡的事，互恁學𪜶敬拜𪜶的神明，致到恁得罪上主 — 恁的上帝。
20:19 恁若圍困一個城，愛真久才會給伊攻破，毋通用斧頭剉果子樹。恁通食𪜶的果子，毋通給剉起來，因為野外的樹木毋是恁的對敵。
20:20 毋拘恁若知影許個樹𣍐結會食得的果子，就通給剉起來，提來做攻城的器具，攻擊及恁交戰的城，直到給城攻破。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。