上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
祭司及利未人應得的份額
18:1 利未人做祭司的，及全利未支族，佇以色列人的中間無分著產業；𪜶通食用火燒獻互上主的祭物，諸個是𪜶的份額。
18:2 𪜶佇𪜶的同胞中間無分著產業；照上主對𪜶的應允，上主就是𪜶的產業。
18:3 下面是祭司對人民應該得著的份額：人獻牛羊做祭物，著將前腿、兩個嘴䩃，及肚，互祭司。
18:4 起頭收成的五穀、新酒、新油，及抵抵剪的羊毛，嘛攏著互𪜶。
18:5 因為上主 — 恁的上帝對恁的支族中間揀選𪜶，互𪜶及𪜶的後代，奉上主的名永遠徛佇伊的面前侍奉。
18:6 若有利未人，無論𪜶住佇以色列境內叨一座城，一心一意欲離開遐去上主揀選的所在服事，
18:7 𪜶通親像仝宗族的兄弟，奉上主 — 𪜶的上帝的名徛佇伊的面前侍奉。
18:8 除了賣祖產得著的以外，𪜶猶原通得著仝款份額的祭物。
毋通隨外族人的風俗
18:9 恁若進入上主 — 恁的上帝賞賜恁的地，毋通學許個民族可惡的風俗。
18:10 恁毋通燒家己的子查某子獻做祭，行邪術，卜卦，看命，做師公，
18:11 畫符，做童乩，做桌頭，牽亡；
18:12 所有做諸個事的人，攏是上主所厭惡；許個民族因為做諸個事，上主 — 恁的上帝對恁的面前給𪜶趕走。
18:13 恁著佇上主 — 恁的上帝面前，做無瑕疵的人。
應允興起一個先知
18:14 恁所欲趕出許個國的人民，攏聽趁卜卦的、行邪術的；恁咧，上主 — 恁的上帝禁止恁按呢做。
18:15 上主 — 恁的上帝欲對恁的同胞中間，興起一個親像我的先知，恁著聽趁伊。
18:16 恁佇何烈山聚會的時，對上主 — 恁的上帝懇求，講：「毋通互阮閣聽見上主 — 阮的上帝的聲，嘛毋通互阮閣看見上主佇火焰中顯現，才免阮攏死。」
18:17 上主就對我講：「𪜶講了真著。
18:18 我欲佇𪜶同胞中間，興起一個親像你的先知。我欲將我的話交代伊；伊欲將我的命令傳達互人民。
18:19 伊奉我的名傳達的話，人若毋聽，我欲給𪜶刑罰。
18:20 毋拘先知若大主大意用我的名講我無命令伊講的話，抑是奉別個神明的名講話，彼個先知著死。」
18:21 恁可能會想：「阮哪會知，此個先知講的話毋是上主所交代的？」
18:22 先知奉上主的名傳達的話，若無實現，無應驗，這就毋是上主的話，是彼個先知大主大意講的，恁毋免驚伊。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。