上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
禁止喪禮的譴損
14:1 恁是上主 — 恁的上帝的子民，毋通為著死人割傷家己的身軀，抑是頭額剃光光，
14:2 因為恁是歸屬上主 — 恁的上帝聖潔的子民；上主有對地上萬民的中間揀選恁，做伊特別的子民。
清氣及無清氣的動物
14:3 ( 利 11:1-47 )
所有通厭惡的物，恁攏毋通食。
14:4 下面是恁通食的牲生：牛、綿羊、山羊、
14:5 鹿、羚羊、赤鹿、野山羊、麋鹿、赤羊、羌仔。
14:6 所有分蹄閣翻草的牲生，恁攏通食。
14:7 毋拘，干焦有翻草，抑是干焦有分蹄的牲生，恁毋通食，就是：駱駝、兔仔、石貛，因為𪜶有翻草無分蹄，對恁是無清氣。
14:8 豬，有分蹄，毋拘無翻草，對恁嘛是無清氣。諸個動物的肉恁毋通食；𪜶的屍體嘛毋通摸。
14:9 水中有鰭有鱗的，恁攏通食；
14:10 所有無鰭無鱗的，恁毋通食，因為𪜶對恁是無清氣。
14:11 清氣的鳥，恁攏通食。
14:12 毋通食的是：鷹、梟、鵰、
14:13 鳶、小鷹、鴟鴞及伊的類、
14:14 烏鴉及伊的類、
14:15 鴕鳥、夜鷹、魚鷹、鵲鷹及伊的類、
14:16 暗光鳥、鴣黃、貓頭鷹、
14:17 鵜鶘、臭頭鷹、鸕鶿、
14:18 鶴、白鴒鷥及伊的類、戴髻鳥，及密婆。
14:19 所有有翼閣會趖的，對恁是無清氣，恁毋通食；
14:20 毋拘會飛閣清氣的，恁攏通食。
14:21 自然死的動物，恁攏毋通食，毋拘通互恁城內寄居的人食，抑是賣互外族人；因為恁是歸互上主 — 恁的上帝聖潔的子民。
毋通用山羊母的奶煮伊的子。
十分一奉獻的規例
14:22 逐年，恁著對撒種所收成田園的出產，十份抽一份。
14:23 恁著佇上主 — 恁的上帝揀選互恁服事伊的所在，佇伊的面前食所奉獻十分一的五穀、酒、油，及頭上生的牛羊；按呢恁通學習常常敬畏上主 — 恁的上帝。
14:24 上主 — 恁的上帝賜福恁，伊所揀選的所在若離恁傷遠，恁𣍐當帶欲奉獻的祭物去遐，
14:25 恁通換做銀，給伊包起來，提佇手裡，去上主 — 恁的上帝揀選互恁敬拜伊的所在。
14:26 恁通照恁的意思用諸個銀買牛、羊、薄酒、厚酒，抑是其他恁看做好的物；佇遐，恁及恁的家眷著佇上主 — 恁的上帝面前做夥飲食歡喜。
14:27 恁著照顧住佇恁中間的利未人，因為𪜶佇恁中間無分著產業。
14:28 每三年，著將第三年收成的十分一，運來囥佇城內；
14:29 恁中間無分著產業的利未人，以及住佇恁中間的出外人、孤兒，及寡婦，攏通來食到飽；按呢，上主 — 恁的上帝會因為恁所做諸個一切的事，賜福氣互恁。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。