上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
以色列人背逆上主
9:1 以色列啊，著注意聽！恁今仔日欲過約旦河，去征服許個比恁較強大的國；𪜶的城大閣堅固，高到抵天。
9:2 𪜶的人民高強大漢，是恁所知的亞衲人；恁曾聽人講：「啥人會當對抗亞衲人？」
9:3 今仔日恁著知，上主 — 恁的上帝會佇恁的頭前過去，親像吞滅的火，欲給𪜶消滅，互𪜶屈服佇恁的面前；恁著照上主的命令給𪜶趕出去，緊緊給𪜶消滅。
9:4 上主 — 恁的上帝為著恁將𪜶趕出去了後，恁心內毋通想講：「上主導阮征服此塊地，是因為阮的功德。」其實，上主是因為許個國邪惡，才給𪜶趕走。
9:5 恁入去佔領𪜶的地，並毋是因為恁有什麼功德，嘛毋是因為恁的心正直，是因為諸個國邪惡，上主 — 恁的上帝才給𪜶趕走；閣因為上主欲實現伊對恁的列祖亞伯拉罕、以撒、雅各，立誓的應允。
9:6 恁著知，上主 — 恁的上帝用媠的地賞賜恁做產業，毋是因為恁的功德，其實恁是心硬固執的民族。
9:7 恁著記互牢，毋通𣍐記得，恁佇曠野惹上主 — 恁的上帝受氣；對恁出埃及地彼日，到恁來到此個所在，恁常常背逆上主。
9:8 恁佇何烈山閣惹上主受氣，致到上主發受氣欲給恁消滅。
9:9 彼時我已經上山，欲領受上主及恁立約的石版；我佇山裡四十暝日，無食無飲。
9:10 上主將伊親手寫的兩塊石版交互我；彼頂面寫的，是上主佇恁舉行大會的日，佇山頂的火焰中對恁所講一切的話。
9:11 四十暝日了後，上主用彼兩塊有寫盟約的石版交代我。
9:12 上主對我講：「起來，趕緊對遮落去，你對埃及導出來的人民已經墮落；𪜶真緊偏離我命令𪜶的道路，為家己鑄一身偶像。」
9:13 上主閣給我講：「我看此個民族真正是心硬固執的民族。
9:14 你出在我，我欲給𪜶消滅，對天下擦消𪜶的名；我欲互你成做比𪜶較強、人較多的國家。」
9:15 我雙手提兩塊約版，越轉身落山；山有火啲燒。
9:16 我一下看，看著恁已經得罪上主 — 恁的上帝，為家己鑄一隻牛仔，真緊偏離上主所命令恁的道路。
9:17 我就將彼兩塊石版㧒落去，佇恁的目睭前摔甲碎碎。
9:18 因為恁所犯一切的罪，做上主看做歹的事，惹伊受氣，我閣一遍仆佇上主的面前四十暝日，無食無飲。
9:19 彼時上主大大受氣，欲給恁消滅，我就非常驚惶；毋拘上主閣一遍聽我的懇求。
9:20 上主嘛對亞倫非常受氣，甚至欲互伊死；像彼時我就為著亞倫祈禱。
9:21 我提恁犯罪的物，就是恁鑄的牛仔像，用火燒，給伊摃碎，研甲親像土粉赫呢幼，閣給諸個撒佇對山頂流落來的溪裡。
9:22 恁佇他備拉、瑪撒、基博羅‧哈他瓦，閣激上主受氣。
9:23 上主命令恁離開加低斯‧巴尼亞，講：「恁去佔領我賞賜恁的地。」彼時恁違背上主 — 恁的上帝的命令，毋相信伊，毋聽趁伊的話。
9:24 對我識恁的日起，恁常常背逆上主。
9:25 我因為上主講欲消滅恁，就四十暝日仆佇上主的面前。
9:26 我對上主祈禱講：「至高的上主，求你毋通消滅你的子民，你的產業；𪜶是你用大權能給𪜶救贖，用大氣力的手給𪜶對埃及導出來的子民。
9:27 求你會記得你的僕人亞伯拉罕、以撒、雅各；毋通看此個子民的硬心、邪惡，及𪜶的罪過，
9:28 才免埃及人講：『上主無法度導𪜶入去伊應允𪜶的地，閣因為怨恨𪜶，所以導𪜶出去，欲佇曠野給𪜶消滅。』
9:29 毋拘𪜶是你的子民，你的產業；你有用大權能，閣伸出大氣力的手給𪜶導出來。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。