上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
承接好的土地
8:1 今仔日我所命令恁一切的誡命，恁著切實遵行，互恁通活，人數加添真多，入去承接上主立誓應允欲互恁列祖的地。
8:2 恁嘛著會記得上主 — 恁的上帝此四十年導恁佇曠野行過的路，互恁謙卑，給恁考驗，欲知恁有對心底遵守伊的誡命抑無。
8:3 伊給恁磨練，互恁枵餓，用恁及恁的列祖攏毋識的嗎哪養飼恁，是欲互恁知，人啲活毋若倚靠餅，是倚靠對上主的嘴所出的逐句話。
8:4 此四十年恁的衫仔褲無破，恁的腳嘛無膨泡。
8:5 恁著知，上主 — 恁的上帝管教恁，親像人啲管教伊的子兒。
8:6 所以恁著遵守上主 — 恁的上帝的誡命，行伊的道路，敬畏伊。
8:7 因為，上主 — 恁的上帝導恁入去彼個媠的地，遐有溪，有水泉，閣有地下水對山谷及山頂流出來；
8:8 遐有出產大麥、小麥、葡萄、無花果、石榴，閣出產橄欖油及蜜。
8:9 恁佇遐食物充足，連一項都無欠；佇遐的石頭有鐵，山內會當挖著銅。
8:10 恁會食到飽，著因為上主 — 恁的上帝所賞賜恁富足的地謳咾伊。
毋通𣍐記得上主
8:11 恁著謹慎，才免𣍐記得上主 — 恁的上帝，無遵守我今仔日所吩咐上主的誡命、命令，及規例。
8:12 恁食飽，有好的厝通徛，
8:13 牛、羊、金、銀，以及恁所有的攏加添真多的時，
8:14 著謹慎，才免恁自高驕傲，煞𣍐記得給恁對埃及地做奴才的家導出來的上主 — 恁的上帝。
8:15 伊導恁經過彼個大閣通驚的曠野，是焦燥無水的地；遐有毒蛇、蝎仔蟲。伊有為著恁互水對碇的石磐流出來。
8:16 伊閣佇曠野，用恁的列祖毋識的嗎哪養飼恁，是欲考驗恁，互恁謙卑，到尾是欲互恁得著福氣；
8:17 才免恁心內想講：「我靠家己的氣力、能力得著諸個產業。」
8:18 恁著會記得上主 — 恁的上帝，恁得著產業的氣力是伊互恁的，是欲實現伊對恁的列祖立誓設立的約，及今仔日像款。
8:19 恁若真正𣍐記得上主 — 恁的上帝，去隨別個神明，服事敬拜𪜶，我今仔日嚴嚴給恁警告，恁一定會滅亡。
8:20 上主互恁看著伊按怎消滅許個民族，恁嘛會按呢滅亡，因為恁毋聽趁上主 — 恁的上帝的話。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。