上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
大誡命
6:1 下面是上主 — 恁的上帝吩咐我著教示恁的誡命、規例、命令，互恁佇欲去佔領的地遵行，
6:2 通互恁及恁的子子孫孫一生敬畏上主 — 恁的上帝，遵守我所命令一切的規例及誡命，互恁長歲壽。
6:3 以色列啊，著注意聽，著切實遵行，互恁通照上主 — 恁列祖的上帝的應允，佇流奶及蜜的地得著福氣，人額加添真多。
6:4 以色列啊，著注意聽，上主 — 咱的上帝是獨一的上主。
6:5 恁著全心、全情、全力疼上主 — 恁的上帝。
6:6 我今仔日命令恁諸個話著記佇心內，
6:7 嘛著殷勤教示恁的子兒。無論佇厝內坐，佇路裡行，倒啲抑是起來，攏著唸互𪜶聽；
6:8 閣著縛佇手裡做記號，縛佇頭額提醒；
6:9 著寫佇厝的門徛，嘛著寫佇城門。
毋通背逆上帝
6:10 上主 — 恁的上帝欲導恁進入伊對恁的列祖，亞伯拉罕、以撒、雅各，立誓欲互恁的地；佇遐有闊大閣媠的城，毋是恁起造的；
6:11 有厝貯真多好物，毋是恁積聚的；有挖好勢的水井，毋是恁挖的；有葡萄園、橄欖樹，毋是恁栽種的。到恁逐項富足的時，
6:12 著謹慎，才免恁𣍐記得導恁對埃及地，對做奴才的家出來的上主。
6:13 恁干焦著敬畏上主 — 恁的上帝，服事伊，奉伊的名咒誓；
6:14 毋通拜別個神明，就是恁四圍的外族啲拜的神明，
6:15 才免上主 — 恁的上帝對恁發大受氣，給恁對地上消滅，因為及恁同在的上主 — 恁的上帝，是要求全情服事伊的上帝。
6:16 恁毋通試探上主 — 恁的上帝，親像恁曾佇瑪撒試探伊一樣。
6:17 著確實遵守上主 — 恁的上帝的誡命，及伊命令恁的教示、規例。
6:18 上主看做正直，看做好的，恁著實行；恁就會事事順利，閣入去佔領上主立誓欲互恁的列祖媠的地；
6:19 恁嘛著照上主的應允將恁所有的對敵趕出去。
6:20 將來恁的子孫問恁講：「上主 — 咱的上帝所命令恁諸個教示、規例、命令是什麼意思？」
6:21 恁著給恁的子孫按呢講：「早前阮佇埃及做埃及王的奴才，上主用大氣力的手導阮出埃及。
6:22 上主佇阮的目睭前行大閣厲害的神跡奇事，對付埃及人、法老及伊的全家，
6:23 導阮對遐出來，互阮入去上主對咱的列祖立誓欲賞賜咱的地。
6:24 上主吩咐咱，著遵行諸個所有的規例，著敬畏上主 — 咱的上帝，互咱一生事事順利，得著伊保全咱的性命，親像今仔日按呢。
6:25 咱若照上主 — 咱的上帝的吩咐，佇伊的面前遵行伊一切的誡命，伊會歡喜接納咱。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。