上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
勸勉以色列人
4:1 以色列人，今我教示恁的規例及命令，恁著聽受遵趁，恁才會活，進入上主 — 恁列祖的上帝賞賜互恁的地，承接做產業。
4:2 我吩咐恁的話，就是上主 — 恁的上帝的命令，著遵守，毋通加添，嘛毋通減少。
4:3 上主因為巴力‧比珥的代誌所做的事，恁有親目看著；所有拜比珥的神明巴力的人，上主 — 恁的上帝攏將𪜶對恁中間除滅。
4:4 只有恁諸個忠誠跟隨上主 — 恁的上帝的人，今仔日攏猶活啲。
4:5 恁著會記得，我有照上主 — 我的上帝的吩咐，將規例及命令教示恁，互恁佇欲入去承接做產業的地遵行。
4:6 所以恁著切實遵行，按呢恁就會佇列國面前顯出恁的智慧聰明；𪜶一下聽著諸個所有的規例，就會講：「此個偉大的國家的人民真正是有智慧聰明。」
4:7 有叨一個大國的神明及伊的人民親近，親像上主 — 咱的上帝及咱即呢親近，互咱通隨時求叫伊？
4:8 有叨一個大國有公正的規例及命令，親像我今仔日傳互恁的律法按呢？
4:9 所以著謹慎，嘛著切實保守恁的心，才免恁𣍐記得恁親目看著的代誌，才免諸個代誌佇恁活啲的時離開恁的心；嘛著用諸個教示恁的子子孫孫。
4:10 恁佇何烈山徛佇上主 — 恁的上帝面前彼日，上主對我講：「你給我招集人民，我欲互𪜶聽見我的話，互𪜶活佇世間的日，通學習敬畏我，閣教示𪜶的後代。」
4:11 彼時恁攏近倚來，徛佇山腳；山裡有火焰淐到天頂，閣有烏雲罩倚。
4:12 上主佇火焰中對恁講話；恁有聽見講話的聲，毋拘無看著什麼形像；只有聲若定。
4:13 伊將命令恁著守的約指示恁，就是十條誡，閣寫佇兩塊石版。
4:14 彼時，上主閣吩咐我將規例及命令教示恁，互恁佇欲過去得著做產業的地遵行。
禁止拜偶像
4:15 恁著特別謹慎，因為上主佇何烈山對火中給恁講話彼時，恁攏無看著什麼形像；
4:16 所以，恁毋通墮落，為家己造任何形狀的偶像，無論是男是女，
4:17 地上的走獸抑是空中的飛鳥，
4:18 地上啲趖的動物抑是水中的魚類，攏毋通造𪜶的像。
4:19 恁攑頭看著天頂的日、月、星辰，嘛毋通受引誘敬拜服事𪜶，因為諸個是上主 — 恁的上帝為著天下萬民排設的天體。
4:20 毋拘上主將恁對鑄鐵的火爐埃及解救出來，做伊的子民，伊的產業，親像今仔日按呢。
4:21 上主閣因為恁的緣故對我受氣，立誓毋互我過約旦河，嘛毋互我進入上主 — 恁的上帝賞賜恁做產業的好土地。
4:22 我著死佇遮，𣍐當過約旦河；毋拘恁會過去佔領彼個好的地。
4:23 恁著謹慎，才免恁𣍐記得上主 — 恁的上帝及恁立的約，違背上主 — 恁的上帝的誡命，為家己雕刻任何形狀的偶像。
4:24 因為上主 — 恁的上帝是吞滅的火，是要求全情服事伊的上帝。
4:25 恁佇彼個地住真久，生子傳孫，若墮落，造逐款形狀的偶像，做上主 — 恁的上帝看做歹的事，惹伊受氣，
4:26 我今仔日就叫天叫地出來作證控告恁，恁會佇過約旦河得著做產業的地真緊滅亡；恁佇彼個地𣍐久長，會徹底受消滅。
4:27 上主會互恁四散佇萬族的中間；佇上主趕恁去許個國，恁賰落來的人真少。
4:28 佇遐，恁會服事人的手用柴用石造的神明；𪜶𣍐看、𣍐聽、𣍐食、𣍐鼻。
4:29 毋拘恁佇遐欲尋上主 — 恁的上帝，若全心全情尋伊，就會尋著。
4:30 將來恁抵著逐款苦難的時，恁會歸向上主 — 恁的上帝，順服伊；
4:31 因為上主 — 恁的上帝是憐憫的上帝，𣍐放拺恁，𣍐剿滅恁，嘛𣍐𣍐記得伊立誓及恁的列祖所立的約。
4:32 恁查考全世界，對以前，就是對上帝創造人類佇世間以來，豈曾有親像此款的大事發生？恁豈曾聽見此款代誌？
4:33 豈有叨一個民族曾聽見上帝對火中講話的聲，親像恁聽見，毋拘猶活啲？
4:34 豈有叨一個神明親像上主 — 恁的上帝，對萬族的中間揀選一族做家己的子民，閣伸出大氣力的手，用災難、神跡、奇事、戰爭，佇埃及為著恁做大閣通驚的事？
4:35 上主按呢對恁顯現，互恁知伊是上帝，以外無別個。
4:36 伊對天互恁聽見伊的聲，為著欲教示恁；閣佇地上互恁看著伊的大火，聽著伊對火中給恁講的話。
4:37 因為伊疼恁的列祖，所以揀選𪜶的後代，親身用大權能對埃及導恁出來；
4:38 對恁的面前將比恁較強大的民族趕走，導恁入去𪜶的地，將此個地賜恁做產業，親像今仔日按呢。
4:39 所以，今仔日恁著知，著會記得，天頂地下只有上主是上帝，以外無別個。
4:40 我今仔日所命令恁伊的規例及誡命，恁著遵守，互恁及恁的後代通得著福氣，佇上主 — 恁的上帝賞賜恁做永遠產業的地久長徛起。
約旦河東旁的避難城
4:41 後來，摩西佇約旦河東旁指定三個城，
4:42 互許個無冤仇，無意中誤殺人的人逃走去遐，通保全性命；
4:43 屬呂便人的是佇曠野平原的比悉，屬迦得人的是基列的拉末，屬瑪拿西人的是巴珊的戈蘭。
頒布上帝的律法
4:44 下面是摩西對以色列人頒布的律法，
4:45 是摩西佇以色列人出埃及了後，傳互𪜶的教示、規例，及命令。
4:46 伊頒布律法的地點佇約旦河東旁，伯‧比珥對面的山谷中，屬住佇希實本的亞摩利王西宏的地；摩西及以色列人出埃及了後刣死西宏。
4:47 𪜶佔領亞摩利人兩個王，西宏及巴珊王噩佇約旦河東旁的地，
4:48 對亞嫩山谷邊的亞羅珥，直到西連山，就是黑門山；
4:49 以及約旦河東旁的亞拉巴地區，直到亞拉巴海，接近比斯迦山山腳的地。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。