上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
拍敗巴珊王噩
3:1 ( 民 21:31-35 )
後來，咱就斡對向巴珊的方向去；巴珊王噩及伊的軍兵出來佇以得來及咱交戰。
3:2 上主給我講：「毋免驚伊，因為我已經將伊及伊的軍兵，以及伊的土地攏交佇你的手；你著親像對付住佇希實本的亞摩利王西宏按呢對付伊。」
3:3 上主 — 咱的上帝就將巴珊王噩及伊的軍兵攏交互咱；咱給𪜶拍死，連一個都無留。
3:4 彼時，咱攻取伊所有的城，無一座城無互咱佔領；按呢，咱攻佔巴珊王噩所統治亞珥歌伯地區全部的六十座城。
3:5 諸個攏是堅固的城，有高的城牆，有門有閂；以外猶有真多無城牆的庄社。
3:6 咱完全給𪜶消滅，親像以前對待希實本王西宏按呢，將城內的查甫人、查某人，及囝仔攏剿滅；
3:7 只有留牲生及對逐個城搶來的物件做家己的戰利品。
3:8 彼時，咱對兩個亞摩利王的手搶奪𪜶佇約旦河東旁的地，對亞嫩山谷到黑門山。
3:9 此個黑門山，西頓人給伊叫做西連；亞摩利人叫伊做示尼珥。
3:10 咱嘛攻取平原所有的城、基列地區及巴珊地區，直到撒迦及以得來；諸個攏是巴珊王噩的城。
3:11 巴珊王噩是利乏音人最後一個人。伊的眠床是鐵的，長大約四公尺，闊兩公尺。現在佇亞捫人的拉巴猶會當看著此頂眠床。
分配約旦河東旁的土地
3:12 ( 民 32:1-42 )
咱得著此塊土地了後，我將亞嫩山谷附近的亞羅珥城，及基列山區的一半，以及其中許個城，攏互呂便人及迦得人；
3:13 將基列其他的地，及巴珊王噩全部的土地，攏互瑪拿西半支族。巴珊的亞珥歌伯地區，嘛叫做利乏音人的地。
3:14 瑪拿西的後代睚珥佔領亞珥歌伯全地區，直到基述人及瑪迦人的邊界；伊用家己的名叫巴珊地區做哈倭特‧睚珥，到今仔日猶用此個名。
3:15 我將基列分互瑪吉宗族。
3:16 我分互呂便支族及迦得支族的地是：對基列到亞嫩山谷，用山谷做界，直到亞捫人的邊界的雅博河，
3:17 包括亞拉巴及倚近約旦河的地，對加利利湖到亞拉巴海，就是鹽海，以及比斯迦山腳東旁的地。
3:18 彼時我吩咐𪜶，講：「上主 — 恁的上帝已經將此個地互恁做家業；恁中間的勇士攏著帶軍器，做恁同胞的先鋒過河。
3:19 毋拘恁的某、恁的囝仔，及恁的牲生 — 我知恁的牲生真多 — 通住佇我所互恁逐個城，
3:20 到上主互恁的同胞及恁像款，佇約旦河彼旁得著上主 — 恁的上帝賞賜𪜶安穩徛起的地，然後恁才通倒來我所賞賜恁做產業的地。」
3:21 彼時，我吩咐約書亞，講：「你有親目看著上主 — 你的上帝對此兩個王所做一切的事，上主嘛欲親像按呢對待恁過河了後抵著的國家。
3:22 恁毋免驚𪜶，因為為恁交戰的是上主 — 恁的上帝。」
摩西𣍐當進入迦南地
3:23 彼時我懇求上主，講：
3:24 「至高的上主，你已經互你的僕人看見你的偉大、你的權能。佇天頂、佇地上，無任何神明會當做親像你所做大權能的作為。
3:25 求你互我過約旦河，看著彼旁肥的地、媠的山，及黎巴嫩。」
3:26 毋拘上主因為恁的緣故對我受氣，毋聽我的懇求。上主對我講：「好啊啦，你毋通閣對我提起此個事。
3:27 你著上比斯迦的山頂，攑頭向東西南北詳細看，因為你𣍐當過約旦河。
3:28 毋拘你著吩咐約書亞，給伊鼓勵，互伊堅強；因為伊欲導諸個人民過去，互𪜶承接你欲看見的地。」
3:29 對按呢，咱就留佇伯‧比珥對面的山谷中。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。