上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
佇曠野流浪
2:1 後來，咱越倒轉，照上主對我的命令，向紅海的方向去曠野；咱踅西珥山真多日。
2:2 上主對我講：
2:3 「恁已經踅此個山區真久啦，著斡對北旁去。
2:4 你著吩咐人民講：『恁的兄弟以掃的後代住佇以東；恁欲經過𪜶的境界，𪜶會驚恁，所以恁著非常謹慎。
2:5 毋通惹𪜶；𪜶的地連腳會當踏赫呢細的位我都無欲互恁，因為我已經將以東互以掃做家業。
2:6 恁著用銀給𪜶買糧食來食，買水來飲。』」
2:7 上主 — 恁的上帝佇恁做的逐項事攏賜福恁；恁行此個闊大的曠野，伊攏給恁看顧；此四十年，上主 — 恁的上帝及恁同在，恁攏無欠缺什麼。
2:8 所以，咱就踅過以東，就是咱的兄弟以掃的後代住的地區；對亞拉巴的路經過以拉他、以旬‧迦別，斡對向摩押曠野的方向去。
2:9 上主閣對我講：「毋通惹摩押人，毋通侵犯𪜶；𪜶的地我嘛無欲互恁做產業，因為我已經將亞珥城互羅得的後代做家業。」
2:10 以前，以米人住佇彼個地區；𪜶人口多閣強，親像亞衲族的人赫躼。
2:11 𪜶嘛及亞衲族的人仝款互人叫做利乏音人；毋拘摩押人叫𪜶做以米人。
2:12 這抵親像早前何利人住佇以東，毋拘以掃的後代嘛給𪜶消滅，續接𪜶住佇遐；嘛親像以色列人佇上主賞賜𪜶做家業的地，將原來的住民趕走像款。
2:13 上主閣講：「恁著起來，過撒烈溪。」對按呢，咱就過彼條溪。
2:14 咱對離開加低斯‧巴尼亞，到過撒烈溪，經過三十八年久；直到彼代的戰士攏死佇軍營，抵照上主對𪜶所立誓的。
2:15 上主的手攻擊𪜶，對軍營中給𪜶完全消滅。
2:16 人民中間的戰士攏死去了後，
2:17 上主對我講：
2:18 「今仔日恁欲對摩押的邊界亞珥城經過；
2:19 恁行倚亞捫人的時，毋通惹𪜶，毋通侵犯𪜶；因為亞捫人的地我無欲互恁做產業，我已經將彼塊地賜互羅得的後代做產業。」
2:20 彼個地區嘛算做利乏音人的地。以前利乏音人住佇遐；亞捫人叫𪜶做散組明人；
2:21 𪜶人口多閣強，親像亞衲族的人赫躼；毋拘上主給𪜶消滅，亞捫人就佔領𪜶的地，續接𪜶住佇遐；
2:22 抵親像上主為著住佇以東的以掃後代消滅何利人，互𪜶續接住佇此個地直到今仔日像款。
2:23 對迦斐託出來的非利士人嘛像款，消滅住佇迦薩及附近庄社的亞衛人，續接𪜶住佇遐。
2:24 今，恁著起來，出發過亞嫩山谷。看咧！我已經將亞摩利人希實本王西宏及伊的土地，交佇恁的手；恁著及伊交戰，佔領伊的土地。
2:25 對今仔日起，我欲互天下萬民攏驚恁，懍恁；互𪜶聽著關係恁的風聲攏煩惱，皮皮惙。
拍敗希實本王
2:26 ( 民 21:21-30 )
我對基底莫的曠野，派使者去見希實本王西宏，用好話對伊講：
2:27 「請你允准阮經過你的地；阮會行大路，𣍐偏左，𣍐偏右。
2:28 阮會用銀給恁買糧食食，買水飲，只有拜託你准阮行過去；
2:29 親像住佇以東的以掃後代，及住佇亞珥城的摩押人對待阮仝款；直到阮過約旦河，進入上主 — 阮的上帝賞賜互阮的地。」
2:30 毋拘希實本王西宏毋肯互咱對伊的地經過，因為上主 — 咱的上帝互伊固執硬心，為著欲互咱給伊拍敗，親像今仔日咱所知的按呢。
2:31 上主給我講：「看咧，我已經將西宏及伊的土地交互你，今你著去佔領伊的土地做恁的產業。」
2:32 彼時西宏及伊的軍兵出來佇雅雜及咱交戰。
2:33 上主 — 咱的上帝將伊交互咱，咱就將伊及伊的子，以及所有的軍兵攏拍死。
2:34 咱閣攻取伊攏總的城，將城內的查甫人、查某人，及囝仔攏剿滅，無留半個；
2:35 只有留牲生及對逐個城搶來的物件做家己的戰利品。
2:36 對亞嫩山谷邊的亞羅珥，及山谷中的城，直到基列，無一個城堅固甲咱無法度攻破，因為上主 — 咱的上帝將諸個城攏交互咱。
2:37 只有亞捫人的地、雅博河邊的地，及山區諸個城，咱無去攻打，因為上主 — 咱的上帝禁止咱。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。