上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
西羅非哈的查某子
27:1 約瑟的後代瑪拿西支族中間，有瑪拿西的元孫，瑪吉的曾孫，基列的孫，希弗的子西羅非哈的查某子，就是瑪拉、挪阿、曷拉、蜜迦、得撒；
27:2 𪜶來會幕門口，徛佇摩西、祭司以利亞撒，及眾首領，以及會眾的面前，講：
27:3 「阮老父死佇曠野，毋是因為及可拉彼黨的人鬥陣攻擊上主；是佇家己的罪中死；毋拘伊無後生。
27:4 是按怎因為阮老父無後生，就將伊的名對伊的宗族提掉？請對阮老父的兄弟分產業互阮。」
27:5 摩西就將𪜶的案件提到上主的面前。
27:6 上主命令摩西，講：
27:7 「西羅非哈的查某子講了有理；你一定著對𪜶老父的兄弟分土地互𪜶做產業，互𪜶繼承𪜶老父的產業。
27:8 你嘛著吩咐以色列人，講：『人若死，無後生，就著將伊的產業分互伊的查某子。
27:9 伊若閣無查某子，就著將伊的產業互伊的兄弟。
27:10 伊若閣無兄弟，就著將伊的產業互伊的老父的兄弟。
27:11 伊的老父若閣無兄弟，就著將伊的產業互伊家族的至親繼承。』」此個是摩西照上主的吩咐，欲做以色列人的規例及命令。
約書亞受揀做摩西的繼承人
27:12 ( 申 31:1-8 )
上主對摩西講：「你上亞巴琳山，去看我賜互以色列人的地。
27:13 你看了，就欲及你的兄哥亞倫仝款，轉去你的列祖遐。
27:14 因為佇尋的曠野，會眾啲給我吵的時，恁違背我的命令；佇淐出水的所在，會眾的面前，無尊我做聖。」(此個水是指尋的曠野，加低斯的米利巴水泉。)
27:15 摩西對上主講：
27:16 「上主，你是賞賜性命互世間人的上帝，求你設立一個人來治理會眾，
27:17 佇𪜶中間出入，導𪜶交戰，互上主的會眾𣍐親像無牧者的羊群。」
27:18 上主對摩西講：「嫩的子約書亞內面有上帝的神，你導伊來，給伊按手，
27:19 互伊徛佇祭司以利亞撒及全體會眾的面前，將職責交代伊。
27:20 閣將你的尊榮權柄分互伊，互以色列的全體會眾攏服從伊。
27:21 伊著徛佇祭司以利亞撒的面前，請以利亞撒用烏陵向上主請示；伊及以色列全體會眾著照以利亞撒的指示出入交戰。」
27:22 摩西就照上主的命令導約書亞來，互伊徛佇祭司以利亞撒及會眾的面前，
27:23 閣照上主對伊的命令，給約書亞按手，將職責交代伊。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。