上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
23:1 巴蘭對巴勒講：「你佇遮給我起七座祭壇，閣準備七隻牛、七隻羊。」
23:2 巴勒就照巴蘭的話做；巴勒及巴蘭佇逐座壇獻一隻牛及一隻羊。
23:3 巴蘭對巴勒講：「你請徛佇你的燒化祭的邊仔，我欲去頭前，無一定上主會對我顯現。伊給我指示什麼，我會給你講。」巴蘭就上去較高無草木的所在。
23:4 上帝對巴蘭顯現，巴蘭對伊講：「我已經準備七座祭壇，佇逐座壇獻一隻牛及一隻羊。」
23:5 上主將巴蘭應該講的話交代伊，閣給伊講：「你倒去巴勒遐，著按呢給伊講。」
23:6 伊就倒去巴勒遐；看著巴勒及摩押的官員猶徛佇燒化祭的邊仔。
23:7 巴蘭就唸詩，講：
巴勒導我對敘利亞來，
摩押王導我出東旁的山。伊講：
「來，給我咒詛雅各；
來，詈罵以色列。」
23:8 上帝無咒詛的，我哪通咒詛？
上主無詈罵的，我哪通詈罵？
23:9 我對山巖看，
對山頂觀看；
此個人民家己徛起，
無及列國排做夥。
23:10 啥人會當計算雅各的土沙？
啥人會當點算以色列的土粉？
願我的死親像義人的死，
我的結局親像𪜶的結局。
23:11 巴勒對巴蘭講：「你是啲創啥？我叫你來咒詛我的對敵，你竟然給𪜶祝福！」
23:12 伊應講：「上主交代我講的話，我哪敢無照實講？」
巴蘭第二遍預言
23:13 巴勒對巴蘭講：「請你及我去別位，佇遐你會當看著𪜶；你只有會看著𪜶的一部份，𣍐當看著𪜶全部。你著佇遐替我給𪜶咒詛。」
23:14 伊就導巴蘭去瑣腓的野地，上比斯迦山頂，起七座祭壇，逐座壇獻一隻牛及一隻羊。
23:15 巴蘭對巴勒講：「你請𫢶遮，徛佇你的燒化祭的邊仔，聽候我去遐見上主。」
23:16 上主對巴蘭顯現，將伊應該講的話交代伊；閣講：「你倒去巴勒遐，著照按呢講。」
23:17 巴蘭就倒去巴勒遐；看著巴勒及摩押的官員猶徛佇燒化祭的邊仔。巴勒問伊講：「上主對你講什麼？」
23:18 巴蘭就唸詩，講：
巴勒，注意聽！
西撥的子，聽咧！
23:19 上帝𣍐親像人講白賊，
嘛𣍐親像人會反悔。
伊豈會講了無做，
豈會講出嘴無實現？
23:20 我奉命祝福；
上主的祝福，我𣍐給伊改變。
23:21 佇雅各看𣍐著災難，
佇以色列看𣍐著災禍，
上主 — 𪜶的上帝及𪜶同在；
佇𪜶中間有謳咾上主 — 𪜶的王的聲。
23:22 上帝導𪜶出埃及；
為著𪜶，伊發出親像野牛的氣力。
23:23 雅各無需要看兆頭，
以色列無需要卜卦；
時間一下到，人講著雅各一定會講：
上帝已經為以色列完成赫大的事！
23:24 此個民族興起親像獅母，
挺身親像獅公；
伊無食獵物，
無飲獵物的血，
一定無欲歇睏。
23:25 巴勒對巴蘭講：「你無給𪜶咒詛都害啊，哪閣給𪜶祝福？」
23:26 巴蘭應巴勒講：「我豈無給你講『上主交代我的話，我一定著照按呢講』？」
巴蘭第三遍預言
23:27 巴勒對巴蘭講：「來，我導你來別位，可能上帝愛你佇遐替我給𪜶咒詛。」
23:28 巴勒就導巴蘭去比珥山的山尖，對遐看落去，會當看著曠野。
23:29 巴蘭對巴勒講：「你佇遮給我起七座祭壇，閣準備七隻牛、七隻羊。」
23:30 巴勒就照巴蘭的話做，佇逐座壇獻一隻牛及一隻羊。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。