上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
刣贏迦南人
21:1 住佇尼革夫的迦南人亞拉得王，聽見以色列人對亞他林的路來，就及以色列人交戰，掠𪜶幾若個人。
21:2 以色列人對上主下願講：「你若真正互阮刣贏諸個人民，阮就欲將𪜶的城完全毀滅。」
21:3 上主聽以色列人的懇求，將迦南人交佇𪜶的手，𪜶就將迦南人及𪜶的城徹底消滅；彼個所在就叫做何珥瑪。
銅鑄的蛇
21:4 以色列人對何珥山出發，踅過以東的地，向紅海的路行；佇路裡，𪜶的心真煩，
21:5 就埋怨上帝及摩西，講：「恁是按怎導阮出埃及，互阮來死佇此個曠野？遮無食物，無水，阮嘛無愛閣食此個白汫無味的物件。」
21:6 上主就派火蛇入去人民的中間，咬𪜶；以色列人死真多。
21:7 人民就去給摩西講：「阮有犯罪，因為阮講話攻擊上主及你；請你求上主給諸個蛇趕離開阮。」摩西就為人民祈求。
21:8 上主對摩西講：「你鑄一尾蛇，吊佇旗杆頂；所有互蛇咬著的，一下看就會活。」
21:9 摩西就鑄一尾銅蛇，吊佇旗杆頂；所有互蛇咬著的，一下看此尾銅蛇，就活。
對何珥山到摩押溪谷
21:10 以色列人出發，紮營佇阿伯。
21:11 閣對阿伯出發，紮營佇摩押東旁曠野內面的以耶‧亞巴琳。
21:12 對遐出發，紮營佇撒烈的溪谷。
21:13 對遐出發，紮營佇摩押及亞摩利的交界，屬亞摩利的亞嫩溪谷彼旁岸，倚近亞摩利的曠野。
21:14 所以，《上主的戰記》按呢記載：
蘇法的哇哈伯、
亞嫩許個溪谷，
21:15 以及許個溪谷的崎，一直到亞珥地區，
倚近摩押的邊界。
21:16 以色列人對遐去比珥；上主曾對摩西講「你聚集人民，我欲水互𪜶」，所講的就是此口井。
21:17 彼時以色列人唱歌講：
井啊，淐水出來！
咱著對伊唱歌！
21:18 這是貴族用奏板開的，
是民間的領袖用柺仔掘的。
𪜶對曠野去瑪他拿，
21:19 閣對瑪他拿去拿哈列，對拿哈列去巴末，
21:20 對巴末到摩押地區的山谷；對遮看落去，會當看著曠野的比斯迦山的山尖。
刣贏亞摩利王及巴珊王
21:21 ( 申 2:26-3:11 )
以色列人派使者去見亞摩利人的王西宏，講：
21:22 「請允准阮經過你的地。阮𣍐斡入去田園及葡萄園，嘛𣍐飲井水；只有行大路，一直到過你的邊界。」
21:23 西宏毋准以色列人經過伊的地，就聚集伊的人民出來曠野，欲攻擊以色列人；佇雅雜及以色列人交戰。
21:24 以色列人用刀刣𪜶，佔亞嫩河及雅博河中間的地，直直到亞捫人遐；因為亞捫人的邊界防守嚴密。
21:25 以色列人佔領亞摩利人所有的城，包括希實本及周圍的庄社。
21:26 希實本是亞摩利王西宏的城；西宏曾攻打以前的摩押王，佔領伊所有的土地，直到亞嫩河。
21:27 所以詩人唸詩，講：
著來希實本；
願西宏的城重建閣堅固。
21:28 有火對希實本發，
有火焰對西宏的城出，
燒毀摩押的亞珥，
燒滅亞嫩河的山頭壇。
21:29 摩押啊，你有災禍啦！
拜基抹神明的人啊，恁滅亡啦！
基抹害伊的查甫人逃亡，
害伊的查某人互亞摩利王西宏掠去。
21:30 阮對希實本到底本給𪜶完全消滅；
阮互地荒廢，直到挪法，
閣到米底巴。
21:31 按呢，以色列人就住佇亞摩利人的地。
21:32 摩西派人去探查雅謝；𪜶佔許個庄社，將許個亞摩利人趕走。
21:33 以色列人就斡對向巴珊的方向去；巴珊王噩及伊的軍兵出來佇以得來及𪜶交戰。
21:34 上主對摩西講：「毋免驚伊，因為我已經將伊及伊的軍兵，以及伊的土地攏交佇你的手；你著親像對付住佇希實本的亞摩利王西宏按呢對付伊。」
21:35 以色列人就刣死噩及伊的子兒，以及伊的人民，連一個都無留啲，閣佔領伊的地。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。