上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
祭司及利未人的職責
18:1 上主對亞倫講：「你及你的子兒，以及你的親族，著承擔聖所受侵犯的罪；你及你的子兒著承擔祭司職份受侵犯的罪。
18:2 你著導利未支族的人來，佇你及你的子兒佇會幕服事的時協助恁。
18:3 𪜶著做你的助手，做會幕的工課；毋拘毋通倚近聖所的器具及祭壇，才免𪜶及恁攏死。
18:4 𪜶著及你做夥佇會幕服事，做會幕所有的工作；毋拘毋通互別個支族的人倚近恁。
18:5 恁著負責執行聖所及祭壇的工作，才免我的受氣閣臨到以色列人。
18:6 我有對以色列人的中間揀恁的親族利未人賞賜恁，歸互上主，通辦理會幕的工作。
18:7 你及你的子兒著佇祭壇及會幕內面，盡恁做祭司的職份；此個祭司的職份是我互恁的禮物。若有別個支族的人倚近恁，著互伊死。」
祭司應得的份額
18:8 上主閣給亞倫講：「我將以色列人分別作聖獻互我的禮物交代你；諸個物攏賜互你及你的後代做永遠的份額。
18:9 人民獻互我至聖的素祭、贖罪祭、賠罪祭中間，無佇祭壇用火燒的祭物攏歸互你及你的後代。
18:10 諸個是至聖的物，你著慎重來食；查甫人攏通食；你著看諸個物做聖。
18:11 「以色列人所獻攑高抑是搖過的祭物，我嘛攏賜互你及你的後代做永遠的份額；你厝內所有清氣的人攏通食。
18:12 「以色列人獻互我上主初熟的物，就是上好的油、酒，及五穀，我攏賞賜你。
18:13 諸個攏歸互你；你厝內所有禮儀上清氣的人攏通食。
18:14 「以色列人永遠獻互上主的物，攏欲歸互你。
18:15 「所有獻互上主頭上生的，無論是人抑是牲生，攏歸互你；毋拘大子一定著贖回；無清氣的牲生頭上生的，嘛著贖回。
18:16 欲贖回滿月以上的，著照聖所的公秤，納五十七公克的銀。
18:17 毋拘頭上生的牛、綿羊、山羊，你毋通贖回；諸個是聖，𪜶的血著灑佇祭壇，油著用火燒做芳芳的祭獻互上主。
18:18 許個肉，親像正腿以及搖過的胸坎肉，像款攏歸互你。
18:19 「以色列人攑高獻互上主聖的祭物，我攏賜互你及你的後代做永遠的份額。
「諸個是上主及你、你的後代所立永遠𣍐廢除的約。」
18:20 上主對亞倫講：「你佇以色列人的境內無產業，佇人民的中間無份額。我就是你的份額，你的產業。」
利未人應得的份額
18:21 上主講：「以色列人的十分一奉獻，我已經賜互利未人做產業，報答𪜶佇會幕服事的勞苦。
18:22 其他的以色列人毋通閣倚近會幕，才免𪜶犯罪來死。
18:23 利未人做會幕的工作，著承擔𪜶家己的罪；這欲做恁世世代代永遠的規例。𪜶佇以色列人的中間毋通有產業。
18:24 因為以色列人將出產的十分一做特別的禮物奉獻互上主，我將諸個賜互利未人做產業，所以我吩咐𪜶，佇以色列人的中間毋通有產業。」
利未人的十分一奉獻
18:25 上主命令摩西
18:26 吩咐利未人：上主有將以色列人獻互伊十分一的奉獻，賜恁做產業；恁著對彼十分一的中間閣提十分一，做特別的禮物獻互上主。
18:27 此個特別的禮物抵親像作穡人所獻初熟的麥仔，及酒窟的新酒。
18:28 按呢，恁對以色列人得著的十分一，提來做特別的禮物獻互上主，將諸個歸互祭司亞倫。
18:29 恁著對所得著一切的禮物，將上好的分別作聖做特別的禮物獻互上主。
18:30 你著對利未人講：恁已經對彼中間奉獻上好的禮物，這抵親像獻初熟的麥仔，及酒窟的新酒。
18:31 恁及恁的家眷通佇逐所在食恁奉獻所賰的；這是恁應該得著的，報答恁佇會幕做工的勞苦。
18:32 恁若奉獻上好的禮物互上主，然後食奉獻所賰的就無罪；若無先奉獻上好的禮物，恁就是褻瀆以色列人的聖物，著受處死。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。