上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
夏甲及以實瑪利
16:1 亞伯蘭的某莎萊無生子；伊有一個女婢夏甲是埃及人。
16:2 莎萊給亞伯蘭講：「上主互我𣍐生。請你及我的女婢同房，豈採我會當對伊得著一個後生。」亞伯蘭聽趁莎萊的話。
16:3 亞伯蘭的某莎萊就將伊的女婢埃及人夏甲互伊的丈夫亞伯蘭做某；彼時亞伯蘭已經住佇迦南地十年。
16:4 伊及夏甲同房，夏甲就懷孕。夏甲知家己有身，就看輕女主人。
16:5 莎萊給亞伯蘭講：「我受委屈攏是你害的。我將我的女婢送互你做某；伊一下知家己有身，就看輕我。願上主佇你我的中間主持公道。」
16:6 亞伯蘭對莎萊講：「伊是你的女婢，你會當照你的意思對待伊。」莎萊給伊苦毒，伊就逃走離開莎萊。
16:7 上主的使者佇曠野的水泉邊抵著夏甲；彼個水泉是佇欲去書珥的路中。
16:8 上主的使者對伊講：「莎萊的女婢夏甲，你對叨位來，欲去叨位？」
伊講：「我對我的女主人莎萊遐逃走出來。」
16:9 上主的使者對伊講：「你著轉去你的女主人遐，順服伊。」
16:10 上主的使者閣對伊講：「我欲互你的後代多甲𣍐算得。」
16:11 上主的使者閣對伊講：
今你懷孕，欲生一個子；
著給伊號名叫做以實瑪利，
因為上主聽著你的苦情。
16:12 伊會親像野驢；
伊欲攻擊人，
人嘛欲攻擊伊；
伊欲及伊的兄弟做對頭。
16:13 夏甲就稱呼彼位對伊講話的上主做「看顧的上帝」；伊講：「我看見上帝，我竟然猶活啲！」
16:14 所以此個井就叫做比珥‧拉海‧萊；此個井佇加低斯及巴列的中間。
16:15 後來，夏甲給亞伯蘭生一個後生，亞伯蘭給伊號名叫做以實瑪利。
16:16 夏甲給亞伯蘭生以實瑪利的時，亞伯蘭八十六歲。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。