上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
七盞燈
8:1 上主吩咐摩西
8:2 對亞倫講：「你點燈的時，七盞燈攏著照向頭前。」
8:3 亞倫就照上主對摩西的命令，點燈照光燈台的頭前。
8:4 此個燈台攏用金拍，連伊的座及花嘛按呢，是照上主指示摩西的形體造的。
利未人的潔淨禮及奉獻禮
8:5 上主對摩西講：
8:6 「你著將利未人對以色列人的中間分別出來，給𪜶潔淨。
8:7 你著按呢給𪜶潔淨：用除去罪的水灑佇𪜶的身軀，閣教𪜶用剃頭刀剃全身軀的毛，洗衫，按呢潔淨家己。
8:8 後來，𪜶著取一隻牛仔，及抄油的幼麵粉的素祭；你嘛著另外取一隻牛仔做贖罪祭。
8:9 你著導利未人來到會幕前，閣聚集以色列全會眾；
8:10 你導利未人來上主面前，互以色列人給𪜶按手。
8:11 亞倫著將利未人對以色列人中間分別出來，做特別的禮物獻互上主，按呢𪜶才通辦理上主的事務。
8:12 利未人著按手佇許個牛仔的頭殼頂；你著獻一隻做贖罪祭，一隻做燒化祭互上主，為利未人贖罪。
8:13 「你著互利未人徛佇亞倫及伊的子的面前，將𪜶做特別的禮物獻互上主。
8:14 按呢，你將𪜶對以色列人中間分別出來，利未人就歸屬我。
8:15 你給𪜶潔淨，獻做特別的禮物；對彼時起，𪜶就通入去會幕侍奉。
8:16 𪜶是以色列人的中間完全獻互我的；我互𪜶歸屬我，代替以色列人所有的頭上子。
8:17 因為以色列中所有頭上生的人抑是牲生，攏是我的。我佇埃及拍死𪜶一切頭上生的彼日，已經將以色列人分別作聖歸屬我。
8:18 今我揀利未人代替以色列人所有的頭上子。
8:19 我對以色列人的中間指派利未人，幫贊亞倫及伊的後代，佇會幕內為著以色列人侍奉，閣為𪜶贖罪，才免以色列人因為倚近聖所，有災禍臨到𪜶。」
8:20 摩西、亞倫，及以色列人全會眾，就對利未人按呢做。上主對摩西所講關係利未人的命令，以色列人攏照按呢做。
8:21 利未人就潔淨家己，洗𪜶的衫；亞倫將𪜶做特別的禮物獻互上主，閣為𪜶贖罪給𪜶潔淨。
8:22 然後，利未人入去，受亞倫及伊的子的指導佇會幕侍奉；上主對摩西所講關係利未人的命令，以色列人攏照按呢做。
8:23 上主對摩西講：
8:24 「下面是關係利未人的規定：𪜶二十五歲以上著來會幕侍奉，
8:25 到五十歲就退休；
8:26 退休了後通佇會幕協助𪜶的兄弟辦理事務，毋免閣負責工作。關係利未人的規定，你著照按呢辦理。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。