上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
拿細耳人的條例
6:1 上主吩咐摩西
6:2 對以色列人宣布：
若有人，無論男女，下特別的願欲做拿細耳人，將家己獻互上主，
6:3 按呢，伊薄酒及厚酒，以及用薄酒厚酒做的醋，攏毋通飲，嘛毋通飲葡萄汁，毋通食葡萄及葡萄乾。
6:4 佇下願期間，葡萄樹所出的，甚至籽及皮，攏毋通食。
6:5 伊佇下願做拿細耳人期間，毋通剃頭；到伊將家己獻互上主的日期滿以前，著分別作聖，出在頭毛發長。
6:6 佇伊做拿細耳人獻互上主的期間，毋通倚近身屍。
6:7 就是父母、兄弟姊妹死，伊嘛毋通為著𪜶的身屍互家己無清氣，因為伊的頭殼有做拿細耳人獻互上帝的記號。
6:8 佇伊做拿細耳人的期間，伊是歸互上主做聖。
6:9 伊的身邊若忽然有人死，致到拍垃墋伊分別作聖的頭殼，伊著佇清氣的日，就是佇第七日剃頭。
6:10 第八日，伊著帶兩隻斑鴿抑是粉鳥仔子來會幕門口，交互祭司。
6:11 祭司著獻一隻做贖罪祭，一隻做燒化祭，為著彼個人因為沐著身屍引起的無清氣贖罪，閣著佇彼日互伊的頭殼重新做聖。
6:12 伊著閣選一日，將家己分別作聖獻互上主；閣著牽一隻一歲的羊仔做賠罪祭；毋拘以前彼幾日無准算，因為伊做拿細耳人彼中間已經沐著垃墋。
6:13 奉獻做拿細耳人的期限若到，著照下面應該遵守的條例做：伊著互人導到會幕門口，
6:14 獻禮物互上主，就是一隻無瑕疵一歲的綿羊仔做燒化祭、一隻無瑕疵一歲的綿羊母仔做贖罪祭，及一隻無瑕疵的綿羊做平安祭；
6:15 閣獻歸籃用抄油的幼麵粉做的無酵餅，以及抹油的無酵薄餅、素祭，及奠酒祭。
6:16 祭司著提諸個禮物，佇上主的面前獻做贖罪祭及燒化祭，
6:17 嘛著將彼隻羊及彼籃無酵餅獻互上主做平安祭，閣獻素祭及奠酒祭。
6:18 拿細耳人著佇會幕門口剃頭，將伊分別作聖的頭毛下佇平安祭的下面燒。
6:19 拿細耳人剃伊分別作聖的頭毛了後，祭司著取煮過的羊一支前腿，閣對籃仔內提一塊無酵餅及一塊無酵薄餅，下佇彼個人的手。
6:20 祭司著將諸個禮物佇上主的面前搖搖咧；諸個及搖過的胸坎肉、攑高的正旁大腿攏做聖物，歸互祭司；然後拿細耳人才通飲酒。
6:21 以上是拿細耳人應該遵守的條例。伊若猶有氣力通獻規定以外的禮物，著照伊下的願獻祭物互上主。
祭司的祝福
6:22 上主命令摩西，
6:23 著對亞倫及伊的子宣布：
恁著按呢給以色列人祝福，講：
6:24 「願上主賜福你，保護你；
6:25 願上主的面的光照你，施恩互你；
6:26 願上主歡喜的面看你，賞賜你平安。」
6:27 按呢，𪜶若奉我的名給以色列人祝福，我就欲賜福以色列人。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。