上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
利未記
安歇日
23:1 上主對摩西講：
23:2 「你著對以色列人宣布我的節日。恁佇上主的節日，著聚集舉行聖會。
23:3 六日著做工，第七日是著完全歇睏的安歇日。此日，恁無論住佇什麼所在，任何的工作攏毋通做，著舉行聖會；因為此日是上主的安歇日。
23:4 「下面諸個是上主的節期，恁著照時聚集舉行聖會。」
𨃟過節及除酵節
23:5 ( 出 12:1-20 民 28:16-25 申 16:1-8 )
「正月十四黃昏的時，是上主的𨃟過節。
23:6 此個月的十五是上主的除酵節；恁著食無酵餅七日。
23:7 頭一日著舉行聖會，任何日常的工作攏毋通做。
23:8 七日久著用火燒祭物獻互上主；第七日著舉行聖會，任何日常的工作攏毋通做。」
獻頭水的收成
23:9 上主命令摩西
23:10 著對以色列人宣布：恁進入我賞賜恁的地，收成五穀的時，著將頭水的五穀一捆帶來交互祭司。
23:11 祭司著佇安歇日的隔日將此捆佇上主的面前搖搖咧，互上主接納。
23:12 獻此捆五穀彼日，恁著將一隻一歲、無瑕疵、公的綿羊仔做燒化祭獻互上主。
23:13 續接閣獻素祭，就是用兩公斤抄油的幼麵粉，用火燒做芳芳的祭物獻互上主；然後閣著獻一公升的酒做奠酒祭。
23:14 無論是餅、焙過的五穀，抑是新收成的麥穗，到恁帶來獻互恁的上帝彼日才通食。恁無論住佇什麼所在，諸個欲做恁世世代代永遠的規例。
七七收割節
23:15 ( 出 34:22 民 28:26-31 申 16:9-12 )
恁著對𨃟過節安歇日的隔日，就是對搖麥捆做祭物獻互上主彼日開始算，滿七個安歇日，
23:16 到第七個安歇日的隔日，就是第五十日，著獻新的素祭互上主。
23:17 逐個家庭著提兩公斤的幼麵粉，摻酵落去烘，做兩塊餅，給搖搖咧做起頭熟的祭物獻互上主。
23:18 彼兩塊餅以外，閣著用七隻一歲無瑕疵的綿羊仔，及一隻牛仔，以及兩隻綿羊，做燒化祭獻互上主；嘛著用素祭及奠酒祭，用火燒做芳芳的祭物獻互上主。
23:19 恁著獻一隻山羊做贖罪祭，兩隻一歲的綿羊仔做平安祭。
23:20 祭司著將彼兩隻羊仔及用起頭熟的麥烘的餅，做夥佇上主的面前搖搖咧分別作聖，做祭物獻互上主，歸互祭司。
23:21 像彼日，著舉行聖會，任何日常的工作攏毋通做。恁無論住佇什麼所在，諸個欲做恁世世代代永遠的規例。
23:22 恁收成五穀，園邊的毋通割了了，落落來的嘛毋通拾；著留互散赤人及出外人。我是上主 — 恁的上帝。
新年
23:23 ( 民 29:1-6 )
上主命令摩西
23:24 著對以色列人宣布：七月初一，恁著完全歇睏，舉行聖會，歕哨角做紀念。
23:25 任何日常的工作攏毋通做；著用火燒祭物獻互上主。
贖罪日
23:26 ( 民 29:7-11 )
上主閣對摩西講：
23:27 「七月初十是贖罪日。恁著舉行聖會，禁食刻苦，嘛著用火燒祭物獻互上主。
23:28 彼日，任何的工課攏毋通做；因為彼日是贖罪日，欲佇上主 — 恁的上帝的面前給恁贖罪。
23:29 像此日，無禁食刻苦的人，著對人民的中間給伊革出。
23:30 佇彼日作工的，我欲對人民的中間給伊消滅。
23:31 任何工作恁攏毋通做；恁無論住佇什麼所在，這欲做恁世世代代永遠的規例。
23:32 恁著禁食刻苦守此日做完全歇睏的安歇日。此個月初九的黃昏到隔日的黃昏，恁著守安歇日。」
搭寮節
23:33 ( 民 29:12-40 申 16:13-15 )
上主吩咐摩西
23:34 對以色列人宣布：七月十五是搭寮節。恁著對此日起連續七日向上主守節。
23:35 頭一日著舉行聖會，任何日常的工作攏毋通做。
23:36 恁著七日久用火燒祭物獻互上主；第八日嘛著舉行聖會，用火燒祭物獻互上主。此個是嚴肅會，任何日常的工作攏毋通做。
23:37 以上是上主的節期；恁著聚集舉行聖會，照日期將燒化祭、素祭，及其他的祭物，以及奠酒祭用火燒獻互上主。
23:38 諸個是恁佇上主的安歇日所獻的禮物、謝願的祭，以及甘心獻的祭以外，著獻互上主的祭。
23:39 恁收成土地出產的時，對七月十五起，著守上主的節期七日；頭一日及第八日著完全歇睏。
23:40 頭一日著提大欉好看的樹仔的果子、棕樹的枝、真艷的樹的樹椏，及溪邊柳樹的枝，佇上主 — 恁的上帝面前慶祝七日。
23:41 逐年的七月，恁著向上主守此個節七日；這是恁世世代代永遠的規例。
23:42 恁著住佇草寮仔七日；所有在地的以色列人攏著住佇草寮仔，
23:43 通互恁逐世代的人知，我導以色列人出埃及的時，有互𪜶住佇草寮仔。我是上主 — 恁的上帝。
23:44 摩西就將上主指定的節期對以色列人宣布。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。