上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
利未記
食祭物的條例
22:1 上主吩咐摩西
22:2 對亞倫及伊的子宣布：
著謹慎處理以色列人分別作聖歸互我的祭物，才免褻瀆我的聖名；我是上主。
22:3 恁逐世代的子孫，若有人身軀無清氣，摸著以色列人分別作聖歸互上主的祭物，彼個人就永遠𣍐用得佇我的面前侍奉我。我是上主。
22:4 亞倫的後代，若有人致著痲瘋抑是下消，佇伊潔淨以前毋通食聖的祭物。若有人摸著互屍體沐著成做無清氣的物，抑是摸著洩精的人，
22:5 抑是摸著啲爬無清氣的活物，抑是摸著任何會互伊無清氣的人；
22:6 所有摸著諸個的人，日落以前攏是無清氣；𪜶若無洗身軀，就毋通食聖的祭物。
22:7 到日落，𪜶才清氣，然後通食祭物；因為這是𪜶的食物。
22:8 自然死的，抑是互野獸拆裂的，攏毋通食，因為這會互人無清氣。我是上主。
22:9 祭司攏著遵守我的命令，才免𪜶褻瀆祭物，犯罪來死。我是給𪜶分別作聖的上主。
22:10 一般人𣍐用得食聖的祭物，連祭司的人客抑是倩工嘛𣍐用得食。
22:11 毋拘，祭司買來的奴隸，及佇𪜶兜出世的人通食祭司的食物。
22:12 祭司的查某子若嫁互祭司家族以外的以色列人，毋通食攑高獻互上主聖的祭物。
22:13 毋拘祭司的查某子若守寡，抑是離婚，無子兒，閣倒來後頭厝，就及伊少年的時仝款，通食𪜶老父的食物。總是，一般的人毋通食聖的祭物。
22:14 若有人無注意食著聖的祭物，著照許個祭物加五分一交互祭司。
22:15 毋通隨便互人食以色列人獻互上主聖的祭物，才免𪜶因為褻瀆聖的祭物致到犯罪；我是給𪜶分別作聖的上主。
22:16 併於上節
會受接納的祭物
22:17 上主吩咐摩西
22:18 對亞倫及伊的子，以及以色列眾人宣布：以色列人，抑是寄居佇以色列人中間的外族人，若獻燒化祭互上主，無論出佇下願抑是甘心獻祭，
22:19 著獻無瑕疵的牛、綿羊，抑是山羊，才會互上主歡喜接納。
22:20 毋通獻有瑕疵的，因為這𣍐得著接納。
22:21 若有人欲甘心獻祭，抑是為著特別的事謝願，獻平安祭互上主，著選健康、無瑕疵的牛抑是羊做祭物，才會得著接納。
22:22 所有睛瞑、著傷、殘廢、皮膚啲爛、生癬、生瘡的動物，攏毋通佇祭壇頂用火燒獻互上主。
22:23 牛抑是羊仔子若肢體有加有減，通做甘心獻的祭；毋拘若做謝願的祭就𣍐得著接納。
22:24 動物的膦核若受傷、硩碎、破裂，抑是閹起來，攏毋通獻互上主。佇恁的土地，以上諸個事恁攏毋通做。
22:25 恁嘛毋通對外族人接受此款牲生做獻互恁的上帝的食物，因為𪜶有缺陷，有瑕疵，所以𣍐得著上主接納。
22:26 上主閣對摩西講：
22:27 「牛、綿羊，抑是山羊出世了通隨伊的母七日；第八日以後，就通用火燒做祭物獻互上主，按呢才會得著接納。
22:28 無論牛抑是羊，毋通仝彼日刣母及子。
22:29 獻謝恩祭互上主，著照規例獻祭物通互伊接納。
22:30 祭物著佇獻彼日食，連一屑仔都毋通留到隔早起。我是上主。
22:31 「恁著切實遵行我的誡命。我是上主。
22:32 毋通褻瀆我的聖名；我欲佇以色列人的中間受尊做聖。我是給恁分別作聖的上主，
22:33 曾導恁出埃及，成做恁的上帝。我是上主。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。