上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
利未記
祭司潔淨的條例
21:1 上主吩咐摩西對亞倫的後代做祭司的宣布：
人民的中間若有人死，祭司毋通因為伊拍垃墋家己，
21:2 只有通為著家己的父母、子查某子、兄弟，以及猶未出嫁的在室女姊妹，諸個骨肉至親，摸𪜶的屍體來拍垃墋家己。
21:3 併於上節
21:4 祭司若已經結婚，毋通因為某的後頭厝有人死來拍垃墋家己，互家己無清氣。
21:5 祭司毋通頭殼剃光光；毋通修嘴鬚；毋通割傷家己的身軀。
21:6 著聖化歸上帝；毋通褻瀆上帝的名；因為𪜶用火燒食物獻互上主 — 𪜶的上帝，所以𪜶著成做聖。
21:7 毋通娶做妓女拍垃墋家己的婦仁人；毋通娶離婚過的婦仁人；因為祭司已經聖化歸上帝。
21:8 人民著看祭司做聖，因為奉獻互恁的上帝的食物是𪜶獻的。我是給恁分別作聖的上主，是聖；恁著看祭司做聖。
21:9 祭司的查某子若做妓女拍垃墋家己，是侮辱伊的老父，著用火給伊燒死。
21:10 佇兄弟的中間做大祭司的，是受抹油設立，穿禮服，擔當聖職；毋通給頭毛拍鬖，嘛毋通拆裂衫。
21:11 毋通倚近屍體，甚至家己的父母死，嘛毋通倚近來拍垃墋家己。
21:12 毋通離開聖所去參加喪禮，才免褻瀆上帝的聖所，因為伊的身軀有上帝抹油設立的記號。我是上主。
21:13 伊著娶在室女做某。
21:14 毋通娶寡婦，抑是離婚的婦仁人，抑是做妓女拍垃墋家己的婦仁人，只有通娶本族的在室女，
21:15 才免伊的後代佇人民的中間受侮辱，因為我是給伊分別作聖的上主。
21:16 上主吩咐摩西
21:17 對亞倫講：你逐世代的子孫身體有缺陷的，攏毋通進前奉獻食物互𪜶的上帝。
21:18 身體有缺陷，無論是失明、腳跛、塌鼻、畸形、
21:19 斷腳斷手、
21:20 隱痀、矮人、目睭有毛病、生癬、生瘡，抑是膦核受傷，此款人攏毋通來到上帝的面前獻祭。
21:21 祭司亞倫的後代，身軀有缺陷的，攏毋通用火燒祭物獻互上主，因為伊有瑕疵，𣍐用得奉獻食物互𪜶的上帝。
21:22 獻互上帝的食物，無論是至聖的，抑是聖的，伊攏通食。
21:23 因為伊有缺陷，所以毋通來到帳簾前，嘛毋通倚近祭壇，才免褻瀆我的聖所。我是給𪜶分別作聖的上主。
21:24 摩西就照按呢對亞倫及伊許個子，以及以色列眾人宣布。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。