上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
利未記
贖罪日的條例
16:1 亞倫兩個子因為無照規例倚近上主，死去；後來，上主命令摩西，
16:2 講：
著給你的兄哥亞倫講，毋通佇規定的時間以外入去聖所的帳簾內，到約櫃頂面施恩座的頭前，才免死；因為我欲佇施恩座頂面的雲中顯現。
16:3 亞倫欲入聖所著照按呢做：帶一隻牛仔做贖罪祭，一隻綿羊做燒化祭。
16:4 伊著洗身軀，然後穿祭司聖的禮服，就是幼麻布的內袍及褲，縖幼麻布的帶，戴幼麻布的禮帽。
16:5 亞倫著對以色列會眾的中間取兩隻山羊做贖罪祭，一隻綿羊做燒化祭。
16:6 伊著為家己及伊的家族獻一隻牛做贖罪祭，
16:7 閣將彼兩隻山羊牽來會幕門口，上主的面前。
16:8 亞倫著為著彼兩隻山羊抽籤；一支籤寫「歸互上主」，另外一支寫「歸互阿撒瀉勒」。
16:9 亞倫著將彼隻抽著歸互上主的山羊，獻做贖罪祭。
16:10 彼隻抽著歸互阿撒瀉勒的山羊，著活活牽來上主的面前，用來贖罪，給伊放去曠野歸互阿撒瀉勒。
16:11 亞倫著將彼隻欲為家己及伊的家族獻做贖罪祭的牛仔牽來刣；
16:12 閣著對上主面前的祭壇提貯滿啲𤏸的火炭的香爐，帶一捧研甲幼幼的香料，入去聖所的帳簾內；
16:13 然後佇上主的面前燒香料，互香煙遮約櫃頂的施恩座，才免伊看著來死。
16:14 伊著提一寡牛仔的血，用指頭仔搵血灑施恩座的東旁，閣對施恩座的正面灑七遍。
16:15 亞倫著閣刣彼隻為著人民做贖罪祭的山羊，帶伊的血入去帳簾內，將血灑佇施恩座的頂面及頭前，及灑牛的血仝款。
16:16 閣著因為以色列人的無清氣及背叛，就是𪜶所有的罪，給聖所潔淨；嘛著照按呢給會幕潔淨，因為會幕有互𪜶的無清氣沐著。
16:17 亞倫入去聖所贖罪猶未出來以前，會幕內毋通有人；伊著佇聖所內面為著家己、伊的家族，及以色列全會眾贖罪。
16:18 然後，伊出來上主面前的祭壇遐，給祭壇潔淨。伊著提一寡牛仔及山羊的血，抹佇祭壇頂彼四支翹起來的角；
16:19 閣著用指頭仔搵血對祭壇灑七遍，給伊潔淨，脫離以色列人的無清氣，閣給伊分別作聖。
擔當罪的山羊
16:20 亞倫為著聖所、會幕、祭壇行潔淨禮了後，著牽彼隻活的山羊來。
16:21 亞倫著雙手按佇羊的頭殼頂，承認以色列人所有的罪孽及背叛，互𪜶所犯的罪攏歸佇彼隻羊的頭殼，然後派人給伊送去曠野。
16:22 彼隻山羊欲帶以色列人所有的罪去到無人住的所在；彼隻羊就放佇曠野。
16:23 後來，亞倫著入會幕，將伊入聖所的時所穿幼麻布的禮服褪起來，留佇遐；
16:24 閣著佇會幕的埕洗身軀，穿伊家己的衫出來，獻伊及人民的燒化祭，為著家己及人民贖罪。
16:25 贖罪祭的油著佇祭壇頂燒。
16:26 彼個放山羊歸互阿撒瀉勒的人，著洗伊的衫，洗身軀，才通入營內。
16:27 做贖罪祭的牛及山羊，𪜶的血帶入至聖所贖罪了後，著給𪜶搬出去營外，將皮、肉，及糞用火燒掉。
16:28 燒諸個物的人著洗伊的衫，洗身軀，才通入營內。
守贖罪日
16:29 每年的七月初十，恁著禁食刻苦，無論是在地人，抑是寄居佇恁中間的外族人，任何的工作攏毋通做；這欲做恁永遠的規例。
16:30 佇此日欲給恁贖罪；恁欲佇上主的面前得著清氣，所有的罪攏得著潔淨。
16:31 此日恁著給伊看做完全歇睏的安歇日，著禁食刻苦；這欲做恁永遠的規例。
16:32 彼個受抹油設立，續接伊的老父做大祭司的，著穿幼麻布聖的禮服，執行贖罪禮。
16:33 伊著為著至聖所、會幕及祭壇行潔淨禮，閣為著祭司及全體會眾贖罪。
16:34 這著做恁永遠的規例，因為以色列人所有的罪，一年一遍欲得著潔淨。
亞倫就照上主命令摩西的去做。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。