上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
利未記
有關下消的條例
15:1 上主命令摩西及亞倫
15:2 著吩咐以色列人，講：
若有查甫人致著下消，伊就無清氣。
15:3 伊因為下消，無論猶啲流，抑是已經停止，攏是無清氣。
15:4 致著下消的人，倒過的眠床及坐過的物件攏是無清氣。
15:5 摸著伊的眠床的，著洗家己的衫，閣洗身軀，佇日落以前是無清氣。
15:6 坐著伊坐過的物件的，著洗家己的衫，閣洗身軀，佇日落以前是無清氣。
15:7 摸著伊的身軀的，著洗家己的衫，閣洗身軀，佇日落以前是無清氣。
15:8 清氣的人若互伊呸著嘴涎，著洗家己的衫，閣洗身軀，佇日落以前是無清氣。
15:9 伊坐過的鞍嘛是無清氣。
15:10 摸著伊坐過的物件的，佇日落以前是無清氣。提許個物件的，著洗家己的衫，閣洗身軀，佇日落以前是無清氣。
15:11 伊猶未洗手以前互伊摸著的人，著洗家己的衫，閣洗身軀，佇日落以前是無清氣。
15:12 伊摸著的粗瓷著摃互破；柴的器具著用水洗。
15:13 下消的人若已經好，為著欲潔淨家己，著等七日；伊著洗家己的衫，用活水洗身軀，就得著清氣。
15:14 第八日，伊著將兩隻斑鴿抑是粉鳥仔子，帶來會幕門口，佇上主的面前交互祭司。
15:15 祭司著獻一隻做贖罪祭，一隻做燒化祭；祭司著為著此個人下消的病佇上主的面前給伊贖罪。
15:16 人若洩精，著洗身軀，日落以前是無清氣。
15:17 沐著精液的衫抑是皮的物件，著用水洗，日落以前是無清氣。
15:18 若男女有性關係，兩個人著洗身軀，日落以前是無清氣。
有關月經的條例
15:19 女子若月經來，伊一定無清氣七日久；所有摸著伊的人，日落以前是無清氣。
15:20 佇伊無清氣的期間，所有伊倒過及坐過的物件攏是無清氣。
15:21 所有摸著伊的眠床的，著洗衫，洗身軀，日落以前是無清氣。
15:22 所有摸著伊坐過的物件的，著洗衫，洗身軀，日落以前是無清氣。
15:23 無論摸著彼個女子的眠床抑是伊坐過的物件的人，日落以前攏是無清氣。
15:24 查甫人若及月經來的女子有性關係，沐著伊的月經，著無清氣七日久，倒過的眠床嘛無清氣。
15:25 女子若佇經期以外流血真多日，抑是經期後猶啲流血，伊流血的期間及佇經期仝款無清氣。
15:26 佇流血的期間，伊倒過的眠床及坐過的物件攏無清氣，及佇經期中間的無清氣仝款。
15:27 所有摸著許個物的人就無清氣；著洗伊的衫，洗身軀，日落以前是無清氣。
15:28 女子血漏若已經好，家己著算七日，伊才清氣。
15:29 第八日，伊著帶兩隻斑鴿抑是粉鳥仔子到會幕門口，交互祭司。
15:30 祭司著獻一隻做贖罪祭，一隻做燒化祭；祭司著為著此個女子血漏的無清氣，佇上主的面前給伊贖罪。
15:31 恁著警戒以色列人毋通違犯潔淨的條例，才免𪜶將我佇𪜶中間的會幕拍垃墋，致到𪜶因為無清氣死。
15:32 以上是關係洩漏致到無清氣的條例，包括下消及洩精的查甫人、
15:33 月經來的女子，及致著洩漏的男女，以及及月經來的女子有性關係的人的條例。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。