上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
啟示錄
上帝受氣的碗
16:1 後來，我聽見有大的聲對聖殿出來給彼七個天使講：「恁去將彼七碗上帝的受氣摒落地。」
16:2 頭一個天使就去，將伊彼碗摒落地，許個有獸的記號及拜過獸的像的人就生臭閣毒的瘡。
16:3 第二個天使將伊彼碗摒落海，海水就變做親像死人的血，海裡的活物攏死去。
16:4 第三個天使將伊彼碗摒落江河及水泉，水就變做血。
16:5 我聽見掌管水的天使講：
現在存在、過去存在，至聖的上帝，
你是公義，你的審判公正。
16:6 因為𪜶有流信徒及先知的血，
現在你用血互𪜶飲；
這是𪜶應受的報應。
16:7 後來我聽見祭壇有聲講：
是啦，全能的主上帝，
你的審判真實公義。
16:8 第四個天使將伊彼碗摒佇日頭，日頭就得著權用炎火燒人。
16:9 人互大炎火燒就褻瀆有權掌管諸個災禍的上帝的名；𪜶猶久無悔改，無歸榮光互上帝。
16:10 第五個天使將伊彼碗摒佇彼隻獸的座位，獸的王國就變做烏暗，人因為痛苦咬舌，
16:11 閣因為痛苦及毒瘡褻瀆天頂的上帝；𪜶猶久無悔改來改變𪜶的所做。
16:12 第六個天使將伊彼碗摒落幼發拉底大河，河水就焦去，為著對東方來許個君王準備一條路。
16:13 我閣看見有三個無清氣的神，親像田蛤仔，對惡龍的嘴、獸的嘴，及假先知的嘴出來。
16:14 諸個是會行奇蹟的惡魔的神，𪜶出去招集普天下的君王，佇全能的上帝所定著彼個大日子出來交戰。
16:15 「著注意！我會親像賊來。彼個醒醒，衫穿便便的人真有福氣，伊時到毋免褪裼行，才免互人看著伊赤身露體的見笑。」
16:16 許個惡魔的神就聚集普天下的君王佇一個所在，希伯來話叫做哈瑪逆頓。
16:17 第七個天使將伊彼碗摒佇空中，就有大的聲對聖殿的寶座發出，講：「完成啦！」
16:18 彼時有熠爁、響聲、雷，及大地動；地上有人類以來毋曾有即呢大的地動。
16:19 彼個大城巴比倫就裂做三塊，列國的城市嘛倒壞。上帝會記得大巴比倫城，互伊飲彼杯貯上帝極大受氣的酒。
16:20 所有的海島攏走無去，山嘛無閣看見。
16:21 然後對天頂有落大雹來抌人，逐塊重約五十公斤，人為著雹的災禍褻瀆上帝，因為此個災禍非常嚴重。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。