上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
啟示錄
羊羔及伊的子民
14:1 後來我閣看，有看見羊羔徛佇錫安山，有十四萬四千人及伊做夥；𪜶的頭額攏有寫羊羔的名及伊的父的名。
14:2 我聽見有聲對天頂出來，親像大水啲瀧的聲，閣親像脆雷的聲；我所聽見此個聲親像琴師啲彈豎琴的聲。
14:3 𪜶佇寶座及四個活物以及眾長老的面前唱一首新的歌，此首歌除了對地上贖回彼十四萬四千人無人會當學。
14:4 𪜶是毋曾親近女性的在室男。羊羔無論去什麼所在，𪜶攏隨到遐。𪜶是對人類中間贖回出來做起頭熟的果子獻互上帝及羊羔的。
14:5 𪜶毋曾講白賊，攏無缺點。
三個天使的信息
14:6 我閣看見另外一個天使佇半空中啲飛；伊有永遠的福音欲傳互𫢶佇地上的人，互逐個邦國、逐個族群、逐個民族，及講逐款語言的人。
14:7 伊大聲講：「著敬畏上帝，歸榮光互伊！因為伊審判人類的時到啦；著敬拜彼位創造天、地、海，及水源的主。」
14:8 另外有第二個天使續落去講：「倒落去啦！互萬國飲伊淫亂的烈酒的大巴比倫倒落去啦！」
14:9 另外有第三個天使續落去大聲講：「若有人拜彼隻獸及獸的像，頭額抑是手有蓋印，
14:10 彼個人嘛著飲上帝受氣的酒，就是斟佇上帝受氣的杯的醇酒。伊會佇聖天使及羊羔的面前受著火及硫磺的苦楚。
14:11 苦楚𪜶的火煙淐上高，永遠無停。許個拜彼隻獸及獸的像，以及有蓋著獸的名的印的人，暝日攏𣍐當安歇。」
14:12 因為按呢，遵守上帝的命令閣堅持信耶穌的信徒著有耐心。
14:13 我閣聽見對天有聲講：「你著寫起來！對今以後為著主喪失性命的人真有福氣！」聖神講：「是，𪜶會脫離勞苦得著安歇，因為𪜶的所做會得著認定。」
收成地上的農作物
14:14 後來，我閣看，有看見一片白雲，雲頂坐一位親像人子的，頭殼戴金花冠，手攑一支利的鐮𠠝仔。
14:15 閣有一個天使對聖殿遐出來，對坐佇雲頂彼位大聲喝：「著攑鐮𠠝仔來收割；因為收割的時已經到，地上的農作物已經真熟啦。」
14:16 坐佇雲頂彼位就將鐮𠠝仔㧒落地，地上的農作物就收成。
14:17 另外一個天使對天頂的聖殿出來，伊嘛攑一支利的鐮𠠝仔。
14:18 閣另外一個管火的天使對祭壇遐出來，大聲對攑利的鐮𠠝仔彼個天使喝，講：「用你利的鐮𠠝仔割地上歸葩的葡萄，因為葡萄已經熟啦。」
14:19 天使就將鐮𠠝仔㧒落地，割地上的葡萄，將葡萄㧒落去上帝大受氣的酒窟。
14:20 葡萄佇城外的酒窟互人踏，就有血對酒窟流出來，大約有兩公尺深，三百公里長。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。