上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
利未記
清氣及無清氣的食物
11:1 ( 申 14:3-21 )
上主閣命令摩西及亞倫
11:2 著對以色列人宣布：
地上所有分蹄閣翻草的牲生，恁攏通食。
11:3 併於上節
11:4 毋拘，恁毋通食駱駝、石貛，及兔仔，因為𪜶有翻草無分蹄，對恁是無清氣。
11:5 併於上節
11:6 併於上節
11:7 豬，有分蹄，毋拘無翻草，對恁是無清氣。
11:8 諸個動物的肉恁毋通食；𪜶的屍體嘛毋通摸；諸個對恁是無清氣。
11:9 水中，無論是海裡抑是河裡，有鰭有鱗的，恁攏通食。
11:10 毋拘水中，無論是海裡抑是河裡，無鰭無鱗的，恁攏著看做通厭惡的物。
11:11 許個對恁通厭惡的物，恁毋通食𪜶的肉；𪜶的屍體嘛毋通摸。
11:12 所有水內無鰭無鱗的，恁攏著看做通厭惡的。
11:13 下面諸個鳥類恁著看做通厭惡的，攏毋通食：鷹、梟、鵰、
11:14 鳶、小鷹及伊的類、
11:15 烏鴉及伊的類、
11:16 鴕鳥、夜鷹、魚鷹、鵲鷹及伊的類、
11:17 暗光鳥、鸕鶿、鴣黃、
11:18 貓頭鷹、鵜鶘、臭頭鷹、
11:19 鶴、白鴒鷥及伊的類、戴髻鳥，及密婆。
11:20 所有有翼閣用四腳啲爬的，是通厭惡的。
11:21 毋拘有翼，用四腳啲爬，閣有腳腿佇地面啲跳的，恁通食；
11:22 包括草蜢、草蜢公、杜伯仔、蟋蟀仔，及𪜶的類，恁攏通食。
11:23 毋拘有翼閣用四腳啲爬的，恁毋通食。
11:24 下面諸個攏會互恁無清氣：所有摸著屍體的，日落以前攏無清氣。
11:25 若有人搬徙屍體，著洗家己的衫，日落以前攏無清氣。
11:26 所有有分蹄無翻草的牲生，對恁是無清氣；給𪜶摸著的嘛無清氣。
11:27 所有有四腳，用腳掌啲行的走獸，對恁是無清氣；摸著𪜶的屍體的，日落以前嘛攏無清氣。
11:28 搬徙諸個走獸的屍體的，著洗家己的衫，日落以前攏無清氣。諸個對恁攏無清氣。
11:29 下面諸個佇地上啲爬的動物，對恁是無清氣的：錢鼠、鳥鼠、杜定及伊的類、
11:30 壁虎、龍子、蟮蟲仔、蛇醫、變色龍。
11:31 以上諸個啲爬的動物，對恁是無清氣；所有摸著𪜶的屍體的，日落以前攏無清氣。
11:32 𪜶的屍體若落佇用柴、布、皮做的物件，抑是麻袋，諸個器具就無清氣；著給𪜶浸佇水裡，到日落才清氣。
11:33 諸個屍體若落佇粗瓷內面，彼內面無論有什麼物件，就攏無清氣；著將彼個粗瓷拍破。
11:34 食物若沐著無清氣的器具內面的水，許個食物就無清氣，器具內面會飲得的物件嘛無清氣。
11:35 許個屍體的一部份若落佇什麼物件，彼個物件就無清氣；連烘爐抑是灶嘛著摃破，因為已經無清氣，對恁嘛無清氣。
11:36 不過，水泉抑是蓄水池內面若有屍體，水猶原清氣；毋拘磕著彼個屍體的，就無清氣。
11:37 屍體的一部份若落佇欲撒的種籽，許個種籽猶原清氣。
11:38 若水已經給許個種籽拍霑，屍體的一部份閣落佇彼頂面，許個種籽對恁是無清氣。
11:39 恁通食的牲生若死，有人摸著伊的屍體，日落以前攏無清氣。
11:40 若有人食彼個肉，著洗家己的衫，日落以前攏無清氣；搬徙死的牲生的嘛著洗家己的衫，日落以前攏無清氣。
11:41 所有佇地上啲爬的活物，無論是用腹肚趖的，用四腳抑是較多腳啲行的，是通厭惡的，攏毋通食。
11:42 併於上節
11:43 恁毋通因為啲爬的活物，致到家己成做通厭惡的；嘛毋通互諸個拍垃墋，致到家己無清氣。
11:44 我是上主 — 恁的上帝，所以恁著分別作聖，因為我是聖；恁毋通因為地上啲爬的活物互家己無清氣。
11:45 我是導恁出埃及的上主，欲做恁的上帝；恁著聖潔，因為我是聖潔。
11:46 以上是關係野獸、飛鳥、水中的活物，以及佇地上啲爬的活物的條例。
11:47 著分別清氣的及無清氣的、會食得及𣍐食得的活物。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。