上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
彼得前書
1:1 我彼得是耶穌基督的使徒，我寫批互受揀選分散佇本都、加拉太、加帕多家、亞細亞、庇推尼等所在寄居的人。
1:2 恁受揀選是照父上帝預定的旨意，對聖神成做聖潔，通順服耶穌基督，閣對伊的血得著潔淨。
願上帝豐豐富富賜恁恩典及平安！
活活的向望
1:3 著稱讚咱的主耶穌基督的父上帝！根據伊無限的仁慈，通過耶穌基督對死人中閣活，上帝有互咱重出世通得著活活的向望，
1:4 來承受伊為著恁保存佇天裡彼個𣍐朽爛，𣍐拍垃墋，𣍐消失的福氣。
1:5 這是欲互恁諸個通過信受伊的大能力保守的人，通得著準備佇終末的時機會實現的拯救。
1:6 為著按呢，雖然恁現在暫時猶著受種種的試煉心艱苦，恁著歡喜。
1:7 這是欲證明恁的信心堪得受考驗，比互火煉過猶會敗壞的金閣較寶貴，通互恁佇耶穌基督顯現的時得著稱讚、榮光，及尊貴。
1:8 恁雖然毋曾看著伊，嘛疼伊；現在無看見伊，猶久信伊。恁有用言語𣍐當表達極大的歡喜，
1:9 因為恁會得著信的結果，就是靈魂的得救。
1:10 關係此個拯救，預言恁會得著恩典許個先知已經有研究閣詳細查考。
1:11 𪜶得著佇𪜶心內基督的神對𪜶的指示，查考關係基督的受苦及後來得著榮光此個預言會佇什麼時，會按怎實現。
1:12 上帝有給𪜶啟示，互𪜶知𪜶的侍奉毋是為著家己，是為著恁。諸個事現在已經有靠對天來的聖神，通過福音的使者傳互恁；諸個事連天使嘛迫切啲聽候愛知。
聖潔的生活
1:13 所以，恁的心志著準備好勢，著警醒，全心向望耶穌基督顯現的時所欲賜恁的恩典。
1:14 著做順服的子兒，毋通照恁以前毋識上帝的時啲放縱私慾。
1:15 呼召恁的上帝是聖潔，恁佇一切的行為嘛著聖潔。
1:16 因為聖經有記載：「恁著聖潔，因為我是聖潔。」
1:17 恁既然求叫用仝一個標準，照逐人的行為審判人彼位做父，就著用敬畏的心佇世間的日子作僑民生活。
1:18 因為恁知，恁受贖回脫離祖先留互恁彼款無路用的傳統，毋是用會敗壞的金銀，
1:19 是用彼位無缺點無污點的羊羔基督所流的寶血。
1:20 基督佇創造宇宙以前先互上帝揀選，佇此個末期才為著恁顯現。
1:21 恁通過基督信互伊對死人中閣活閣賜伊榮光彼位上帝；按呢，恁的信及向望攏在佇上帝。
1:22 恁已經對順趁真理來潔淨家己，有純真的手足之情，就著用清氣的心對心底熱切相疼。
1:23 恁重出世，毋是對會敗壞，是對𣍐敗壞的種籽，就是通過上帝活活、永遠𣍐無去的話。
1:24 因為聖經有記載：
人攏親像草，
𪜶的榮華攏親像草花；
草會焦，
花會謝，
1:25 總是主的話永遠存在。
這就是傳互恁的福音的信息。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。